कुनै समय चीनका सबैभन्दा धनी व्यक्ति रहेका तथा उर्जा क्षेत्रका टाइकुन मानिने ली हेचुन पक्राउ परेको समाचार सार्वजनिक भएको छ। हानर्जी ग्रुपका संस्थापक लीलाई लियाओनिङ प्रान्तस्थित चिनचाउ सहरमा प्रहरीले डिसेम्बर १७ मा पक्राउ गरेको काइसिन नामक म्यागेजिनले बुधबार जनाएको छ।
उनको गिरफ्तारीको कारण खुलेको छैन।
एक सञ्चारमाध्यमले जनाएअनुसार उनलाई ब्यांक अफ चिनचाउको ऋणसम्बन्धी मुद्दामा समातिएको हो। जुन ब्यांकले लीलाई सबैभन्दा बढी ऋण दिएको छ। सो ब्यांकले हानर्जी थिन फिल्म नामक लीको कम्पनीलाई २०१५ मा आईपीओ जारी गर्दा डेढ अर्ब डलर ऋण दिएको थियो। सो कम्पनीले आईपीओमा ७६ करोड डलर उठाएको थियो।
सो वर्ष २६ अर्ब डलर सम्पत्ति सहित ली चीनको सबैभन्दा धनी व्यक्ति भएका थिए। किनभने हानर्जी ग्रुपको सेयर मूल्य एक वर्षमै सात गुणाले बढेको थियो।
तर, मे २०१५ मा २० मिनेटमै सो कम्पनीको सेयर मूल्य ४७ प्रतिशतले घटेको थियो। त्यसबेला कम्पनीले १४४ अर्ब हङकङ डलर गुमाएको थियो।
हङकङ सेक्युरिटिज एन्ड फ्युचर्स कमिसनले गरेको छानबिनपछि उनको कम्पनीको सेयर कारोबार २०१९ मा बन्द गरिएको थियो।
त्यसपछि लीलाई कम्पनीको निर्देशक बन्नबाट ८ वर्ष प्रतिबन्ध पनि लगाइएको छ।
लीले १९८९ मा विश्वविद्यालयका एक लेक्चररसँग ५० हजार युआन सापटी लिएर पाँच वर्षभित्रै ८ करोड युआन बनाएको दाबी गरेका थिए।
१९९४ मा उर्जा क्षेत्रमा प्रवेश गरेका पहिले साना र पछि ठुल्ठूला जलविद्युत आयोजनामा लगानी गरे।
२०११ मा उनी सौर्य उर्जामा प्रवेश गरे। तर, पछि उनको कम्पनी घाटामा गयो र उनीमाथि छानबिन सुरु भएको थियो। एससीएमपी
Shares
प्रतिक्रिया