शनिबार हुने कास्की क्षेत्र नम्बर २ को उपनिर्वाचनको सबै तयारी सकिएको निर्वाचन आयोगले जनाएको छ। शनिबार बिहान ७ बजेदेखि साँझ ५ बजेसम्म मतदान हुने कार्यतालिका छ। निर्वाचन अधिकारी महेन्द्रराज सु्वेदीका अनुसार निर्वाचनका सबै आवश्यक सामग्रीसहित कर्मचारीहरु निर्वाचन केन्द्रमा खटिएका छन्।
निर्वाचनका लागि ५६ प्रकारका सामग्री रहेको उनले जनाए। कर्मचारीसँगै सुरक्षाकर्मी र स्वयंसेवक पनि निर्वाचन केन्द्रमा खटिएको उनले बताए। सुवेदीका अनुसार चुनावमा चार सय १० जना कर्मचारी खटिएका छन्। एक मतदान केन्द्र बराबर पाँच जनाका हिसाबले आयोगले कर्मचारी खटाएको छ।
यहाँ ८२ वटा मतदान केन्द्र र ३२ वटा मतदान स्थल रहेका छन्। पोखरामा ११ वटा वडाका ७१ हजार आठ सय ७१ जना मतदाताले मतदानमा भाग लिनेछन्। प्रतिनिधीसभा क्षेत्रभित्रका प्रदेश ‘क’ र ‘ख’ मा १६–१६ वटा मतदान केन्द्र तोकिएका छन्। चुनावमा भा लिनेमध्ये ३८ हजार सात सय ६४ जना महिला र ३३ हजार एक सय छ जना पुरुष रहेका छन्।
आयोगले शनिबार बिहान ७ देखि साँझ ५ बजेसम्म मतदानको समय तोकेको छ। मतदान सकिएपछि साँझ ५ देखि ७ बजेसम्म मतपेटिका संकलन गर्ने, ७ बजे सर्वदलीय बैठक बस्ने र बैठक सकिएपछि जिल्ला समन्वय समिति कास्कीमा मतगणना गरिने कार्यतालिका रहेको छ। उनीहरुको मतको आधारमा नै २१ मध्येबाट एकजना प्रतिनिधीसभा सदस्य चुनिनेछन्।
यहाँको चुनावमा १० स्वतन्त्र सहित ११ राजनीतिक दलका उम्मेदवार गरि कुल २१ जना चुनावमा भिड्दैछन्। चुनावी प्रतिस्पर्धामा सत्तारुढ दल नेकपाबाट विद्या भट्टराई, प्रमुख प्रतिपक्षी दल नेपाली कांग्रेसबाट खेमराज पौडेल, राष्ट्रिय प्रजातन्त्र पार्टीबाट रोमबहादुर भण्डारी, संघीय समाजवादी पार्टीबाट धर्मराज गुरुङ, साझा पार्टीबाट रजनी केसी रहेका छन्।
यसैगरि विवेकशील नेपाली दलकी जमुना शर्मा स्वतन्त्र उम्मेदवार बनेर मैदानमा छन्। नेपाल कम्युनिस्ट पार्टी (माले)का तर्फबाट टेकनाथ भण्डारी, नेपाली कांग्रेस (बीपी)का तर्फबाट चन्द्रबहादुर रानाभाट, राष्ट्रिय जनमुक्ति पार्टीका तर्फबाट पूर्णबहादुर राना, देशभक्त समाजका तर्फबाट वीरबहादुर विश्वकर्मा, राष्ट्रिय प्रजातन्त्र पार्टी (संयुक्त)बाट गंगा मल्ल, मंगोल नेसनल अर्गनाइजेसनबाट रियाज गुरुङ पनि मैदानमा रहेका छन्।
स्वतन्त्रबाट उमानाथ गौतम, कमलजंग कुँवर, दीपक रेग्मी, नवराज बाँस्तोला, यज्ञप्रसाद पगेनी, रनबहादुर दमै, लक्ष्मीकुमारी भुजेल, सुनीलबहादुर कोइराला तथा सुनील भुसाल उम्मेदवार रहेको निर्वाचन आयोगले जनाएको छ। उम्मेदवारमध्ये ८ जनाले आफैलाई भोट हाल्नेछन् भने बाँकी उम्मेदवारले आफूलाई भोट हाल्न पाउने छैनन्।
प्रतिक्रिया