अशोककुमार राई नेतृत्वको जनता समाजवादी पार्टीले मधेस प्रदेशमा आफू नेतृत्वकै पार्टीका सांसदहरु बढी हुने दाबी गरेको छ।
बिहीवार काठमाडौंमा पत्रकार सम्मेलन गरी जसपाले महासचिव मोहम्मद ईश्तियाक राईले केन्दमा झैँ मधेस प्रदेश सरकारमा पनि आफूहरूकै नेतृत्वका सांसदहरूको बहुमत हुने दाबी गरे।
केन्द्र सरकारमा पनि ५० प्रतिशत भन्दा बढी आफ्नो पार्टीमा रहेको र मधेस प्रदेशमा पनि सो भन्दा बढी सांसदहरू आफूहरु पक्षको हुने उनको भनाइ थियो।
मधेस प्रदेशमा जसपा, नेपालमा रहेका १९ जना सांसदहरू रहेको र २१ दिनभित्र कसको पक्षमा बहुमत पुग्छ भन्नेकुरा स्पष्ट हुने बताए।
‘मधेस प्रदेशको सवाल राख्नुभएको छ। २१ दिने सूचना जारी भएको छ। कति जना हाम्रो विचारलाई, पार्टीलाई सकारात्मक रुपमा लिएर आउनुहुन्छ भन्नेकुरा छिट्टै थाहा पाउनुहुनेछ,’ उनले भने, ‘मधेस प्रदेशमा हामी उहाँहरु भन्दा बढी नै हुन्छौँ। १९ जना हुनुहुन्छ। यहाँ जसरी ५० प्रतिशत भन्दा बढी छ, त्यहाँ पनि यो भन्दा बढी नै हुन्छन्।’
महासचिव राईले जसपा, नेपालका अध्यक्ष उपेन्द्र यादवले पार्टी कमिटीहरुमा निर्णय भएको भन्दा फरक किसिमले व्यवहार गर्ने, अन्य पदाधिकारीको सहअस्तित्व स्वीकार नगर्ने प्रवृत्तिले गर्दा नयाँ पार्टी गठन गर्नुपरेको बताए।
उनले संघीय संरचना भएको मुलुकमा यस किसिमले पार्टी सञ्चालन गर्दा अन्ततो गत्वा पार्टी नै ध्वस्त हुने अवस्था र निश्चित क्षेत्रमा पार्टी पुग्ने अवस्था पार्टीको नेतृत्वबाट देखिएकाले पहिचानसहितको संघीयता, सत्तामुलक समृद्धि र अग्रगामी परिवर्तनका पक्षमा रहेका नेताहरुले चक्रव्युहबाट मुक्ति लिन आवश्यक भएकाले छुट्टै जनता समाजवादी पार्टी नामक राजनीतिक दल गठन गरेको बताए।
Shares
प्रतिक्रिया