भारतीय प्रधानमन्त्री मोदीको पार्टीका एक नेता पक्राउ, बंगलादेशी नागरिक भएको आरोप (भिडिओ)

भारतमा प्रधानमन्त्री नरेन्द्र मोदीको पार्टी भारतीय जनता पार्टी (बीजेपी) का एक नेतालाई अवैध नागरिक भएको आरोपमा प्रहरीले पक्राउ गरेको छ।

बीबीसी हिन्दीका अनुसार बंगलादेशी नागरिक भएको खुलासा भएपछि बीजेपी पार्टीको भ्रातृ संगठन अल्पसंख्यक शाखाका उत्तर मुम्बई प्रमुख रुबेल जोनु शेखलाई प्रहरीले पक्राउ गरेको हो।

मुम्बई प्रहरीका डीएसपी एस चैतन्यले सञ्चारमाध्यमसँग भनेका छन्, ‘हामीले झुटो दस्तावेज राखेको आरोपमा उनलाई पक्राउ गरेका हौं।’

घटनाका विषयमा भारतीय कांग्रेसका नेता सचिन सावन्तले सामाजिक सञ्जालमार्फत प्रश्न उठाएका छन्, ‘बीजेपीको उत्तर मुम्बईको अल्पसंख्यक शाखाको जिल्ला अध्यक्षजस्तो महत्वपूर्ण पदमा रहेका व्यक्ति रुबेल शेख बंगलादेशी नागरिक रहेछन् ! के नागरिकता सम्बन्धनमा बीजेपीको छुट्टै नीति छ? यसको जवाफ दिनुपर्छ।’  

सुन्नुहोस्, भिडिओ :

भाजपा का अल्पसंख्यक सेल का अध्यक्ष बांग्लादेशी निकला। यही भाजपा का संघजिहाद है क्या? pic.twitter.com/FEUVtF2U3o

— Sachin Sawant सचिन सावंत (@sachin_inc) February 19, 2021

अहिले सामाजिक सञ्जालमा बीजेपी सांसदसँग रुबेल शेख बसेको एक तस्बिर व्यापक सेयर भइरहेको बीबीसी हिन्दीले जनाएको छ।

गोपाल सेट्टीले रुबेल शेख बीजेपीअन्तर्गत उत्तर मुम्बईको अल्पसंख्य शाखाका प्रमुख रहेको तर अहिले पदबाट बर्खास्त गरिएको बताएका छन्।

यस्तै महाराष्ट्र राज्यका गृहमन्त्री अनिल देशमुखले शुक्रबार भनेका छन्, ‘रुबेल शेखले फर्जी कागजातका आधारमा भारतीय नागरिकता लिएका रहेछन्। यसबारे अनुसन्धान भइरहेको छ।’