मिथिला नगरपालिकामा नेकपा एमालेबाट बागी उम्मेदवार निवर्तमान प्रमुख हरिनारायण महतोले उम्मेदवारी फिर्ता लिने भएका छन्।
उनले उम्मेदवारी फिर्ता लिने विषयमा छलफल गर्न पार्टी केन्द्रीय कार्यालयले बोलाएको थियो। महतोले उम्मेदवारी फिर्ता लिने बताएका छन्।
‘म फिर्ता लिन्छु। पार्टी अध्यक्ष केपी शर्मा ओलीले तपाईंको व्यवस्थापन गर्छु भनेपछि फिर्ता लिने निष्कर्षमा पुगेको हुँ। अहिले काठमाडौंबाट फर्किँदै छु’ उनले भने।
अन्तिम समयमा एमालेले राजाराम महतोलाई प्रमुखको टिकट दिएपछि उनले स्वतन्त्र रुपमा मनोनयन दर्ता गराएका थिए।
नेकपा एमाले नगर समितिले हरिनारायण महतोलाई प्रमुखको उम्मेदवारका लागि एकल सिफारिस गरेको थियो। तर, टिकट अन्ततः राजाराम महतोले पाउन सफल भएका थिए।
राजाराम पूर्व रियलस्टेट व्यावसायी हुन्। २०७४ को निर्वाचनमा कांग्रेसबाट टिकट नपाएपछि स्वतन्त्र उम्मेदवार बनेर उनले चुनाव लडेका थिए।
जसका कारण एमालेबाट हरिनारायणलाई जित्न सहज भएको थियो।
राजारामलाई हरिनारायणले नै पहल गरेर केही वर्षअगाडि एमालेमा प्रवेश गराएका थिए। निवर्तमान मेयर हरिनारायण एमालेका केन्द्रीय सदस्य हुन्।
एमाले धनुषा जिल्ला अध्यक्ष रहिसकेका हरिनारायणले टिकट वितरणमा रघुवीर महासेठले चलखेल गरेको आरोप लगाएका थिए।
Shares
प्रतिक्रिया