यस्तो छ ‘मिसिङ : केटी हराएको सूचना’ को पहिलो गीत

दीपेन्द्र गौचन निर्देशित फिल्म ‘मिसिङः केटी हराएको सूचना’ को पहिलो गीत सार्वजनिक भएको छ। ‘हेर्दै जाउँ!’ बोलको गीतमा रोहित जोन क्षेत्री र शितुसित बस्नेतको स्वर सुन्न सकिन्छ।

गीतमा निर्देशक गौचनकै शब्द तथा संगीत रहेको छ। गीतको भिडिओमा मुख्य कलाकार सृष्टि श्रेष्ठ र नाजिर हुसेन फिचर्ड छन्।

गीतमा संजोगले अचानक भएको भेट र बेहिसाब जिन्दगी कता जान्छ भन्ने निश्चित नरहेको एक युवक र युवतीको कथा भन्छ। जिन्दगीको यात्राका क्रममा भेटिएका युवा–युवतीलाई जिन्दगीको गन्तब्य नै निश्चित नरहेको भावमा गीत लेखिएको छ। दुई साथीबीचको लामो समयपछिको भेटमा हुने खुसी भिडियोमा देखिन्छ।

यो आगामी कात्तिक ३० गतेबाट प्रदर्शनमा आउँदैछ। यसअघि फिल्मको टिजर सार्वजनिक भएको थियो।

यो चलचित्रको निर्देशन करिब ३२ वर्षअघिको डकु–ड्रामा ‘उजेली’का निर्देशक दीपेन्द्र गौचनले गरेका हुन्। निर्देशक गौचन स्वयंको स्क्रिप्ट लेखन रहेको सिनेमालाई अमर महर्जनले खिचेका छन् ।