दुई विधेयक पारित गरेर गण्डकीको हिउँदे अधिवेशन अन्त्य

गण्डकी प्रदेशको हिउँदे अधिवेशनको अन्त्य भएको छ।

अल्पमतमा परेको गण्डकी प्रदेश सरकारको सिफारिसमा प्रदेश प्रमुख पृथ्वीमान गुरुङले सदन अन्त्यको निर्णय गरेका हुन्।

केन्द्रमा सत्ता समीकरण बदलिएसँगै मंगलबार मुख्यमन्त्री सुरेन्द्रराज पाण्डेले माओवादीका दुईजना मन्त्री बर्खास्त गरेका थिए भने बुधबार माओवादी केन्द्रले सरकारलाई दिएको समर्थन फिर्ता लिएको थियो।

संविधानको धारा १६८ को उपधारा २ अनुसार गठित सरकारलाई विश्वासको मत दिएको दलले समर्थन फिर्ता लिएको एक महिनाभित्र पुनः विश्वास प्रमाणित गर्नुपर्ने व्यवस्था छ।

गण्डकीको हिउँदे अधिवेशन फागुन १६ गते सुरु भएको थियो। त्यसपछि फागुन २० र २१ गते संसद चलेको थियो।

सदनले आमसञ्चार विधेयक र बीउबिजनसम्बन्धी व्यवस्था गर्न बनेको विधेयक पारित गरेको छ।