हङकङ क्रिकेट टोलीका कप्तान गिरफ्तार, इन्स्योरेन्स कम्पनीलाई ठगी गरेको आरोप

हङकङको मुख्य क्रिकेट टोलीका कप्तानलाई प्रहरीले ठगी गरेको आरोपमा गिरफ्तार गरेको छ।

२८ वर्षका क्रिकेटर अजियाज मोहम्मद खान जो काउलुन क्रिटेक क्लबबाट पनि खेल्छन् उनीमाथि इन्स्योरेन्स कम्पनीलाई ३० लाख हङकङ डलर ठगी गरेको आरोप लागेको हो।

साउथ चाइना मर्निङ पोस्टका अनुसार उनले आफू सडक दुर्घटनामा घाइते भएको भन्दै पैसा असुली गरेका थिए।

यद्यपी उनले घाइते भएको भनेको अवस्थामा क्रिकेट खेलेको र अन्य काम गरेको प्रहरीको भनाइ छ। उनलाई मंगलबार चाइ वानको फ्ल्याटबाट पक्राउ गरिएको हो।

गत जुनमा उनले इन्स्योरेन्स कम्पनीबाट पैसा ठगी गरेको बताइएको छ। यस विषयमा यतिबेला थप अनुसन्धान भइरहेको छ।