साउन ३ गते त्रिभुवन विमानस्थल बाहिरबाट बरामद भएको सुन तस्करी प्रकरणमा उच्चस्तरीय समिति बनाउन दलहरुबीच सैद्धान्तिक सहमति जुटेको छ।
सोमबार राति सिंहदरबारमा बसेको उक्त बैठकमा प्रमुख प्रतिपक्षी नेकपा एमालेले उठाउँदै आएको उच्चस्तरीय समिति बनाउने कुरामा दलहरु सहमत भएका हुन्।
उक्त बैठकले उच्चस्तरीय समिति बनाउने कुरामा सहमति जुटाउँदै तीन सदस्यीय कार्यदल पनि बनाउने निर्णय गरेको छ।
उच्चस्तरीय समितिको टीओआर तय गर्नका लागि एमाले संसदीय दलका उपनेता सुवास नेम्वाङ, नेकपा माओवादी केन्द्रका प्रमुख सचेतक हितराज पाण्डे र नेपाली कांग्रेसका प्रमुख रमेश लेखक सदस्य रहेको तीन सदस्यीय कार्यदल बनाइएको हो।
एमालेका प्रमुख सचेतक पदम गिरीले उच्चस्तरीय समितिको ड्राफ्ट बनाउने गरी तीन नेता सम्मिलित कार्यदल बनाइएको जानकारी दिए।
उच्चस्तरीय छानबिन समितिको टीओआर बनाउन ३ नेतालाई जिम्मेवारी : पदम गिरी pic.twitter.com/zTWEjD7CKD
— Nepalkhabar (@nepalkhabar) August 21, 2023
‘आजको बैठकममा तस्करीको विष्यमा उच्चस्तरीय समति बनाउने कुरा राख्यौँ। सत्तारुढ दलहरुबाट छानबिन समिति बनाउन तयार छौँ भन्ने भएको छ’, उनले भने, ‘उच्चस्तरीय समितिमा सत्तारुढ दलहरु पनि सहमत भएपछि तीन सदस्यीय कार्यदल बनाइएको छ।’
उक्त कार्यदलले उच्चस्तरीय समितिको टीओआर मंगलबार बिहान ११ बजेसम्म तय गरेपछि दिउँसो २ बजे शीर्ष दलको बैठक बस्ने गिरीले बताए।
उनले सत्तारुढ दलहरु भोलि पनि अहिलेकै प्रतिबद्धतामा उभिएमा साउन १० गतेदेखि अवरुद्ध संसद् पनि खुल्ने जानकारी दिए।
गिरीले केन्द्रीय अनुसन्धान ब्युरो (सीआईबी) को छानबिनमा कमजोरी देखियो भने सुधार्ने गरी उच्चस्तरीय समितिले काम गर्ने बताए।
उनले भोलिका दिनमा अहिलेको जस्तो सुन तस्करी रोक्ने गरी समिति बनाउने माग आफूहरुले गरेको पनि बताए।
बैठकमा सहभागी राष्ट्रिय स्वतन्त्र पार्टीका सभापति रवि लामिछानेले पनि उच्चस्तरीय समितिका लागि सहमति बनेको बताए।
भोलि संसद खुल्ने रास्वपा सभापति लामिछानेको आशा,
— Nepalkhabar (@nepalkhabar) August 21, 2023
जिम्मेवार प्रतिपक्षको भूमिका निर्वाह गरेर यहाँसम्म आएको भनाइ pic.twitter.com/jtmGhfS9qe
उनले तीनजना नेता सदस्य रहेको ड्राफ्ट मस्यौदा समिति पनि गठन भएको जानकारी दिए।
‘करिब सहमति भएको छ। दुईवटा बैठकमा जिम्मेवार प्रतिपक्षी भएर भूमिका खेल्यौँ’, उनले भने, ‘भोलि अर्कै चिजमा गएर बिग्रियो भने मात्रै नत्र दलहरु उच्चस्तरीय समितिमा सहमत भइसकेका छन्।’
नेपाली कांग्रेसका प्रमुख सचेतक रमेश लेखकले पनि बैकठमा सकारात्मक छलफल भएको बताए।
उच्चस्तरीय समितिको विषय भोलि टुङ्ग्याउँछौं, संसद पनि बस्छ : रमेश लेखक pic.twitter.com/GjF1Qdp6oJ
— Nepalkhabar (@nepalkhabar) August 21, 2023
‘सबै कुरा र विकल्पमा कुरा भएको छ’, उनले भने, ‘सकारात्मक छलफल भएको छ। भोलि संसद् चल्छ। भोलि सबै कुरा टुंगिन्छ, संसद पनि चल्छ।’
Shares
प्रतिक्रिया