उम्मेदवारहरू अन्तिम चुनावी प्रचारप्रसारमा थिए। बझाङ प्रतिनिधि सभा १ प्रदेश सभा १ का नेकपा एमाले उम्मेवार दमनबहादुर भण्डारी पनि चुनावी धपेडीमै थिए।
चुनावको पूर्वसन्ध्यामा वैशाख ११ गते भण्डारीलाई पितृशोक पर्यो। उनका बुवा ८८ वर्षीय चक्रबहादुर भण्डारीको निधन भयो। त्यसपछि भण्डारी चुनावी प्रचारप्रसारमा बस्ती पुग्न सकेनन्। उनी अहिले बुवाको किरियामा छन्।
बुवा गुमाएका उनै एमालेका भण्डारी बझाङबाट सुदूरपश्चिम प्रदेश सभा सदस्यमा निर्वाचित भएका छन्। बुवाको किरियामा रहेका भण्डारी सेतै कपडामा मतगणनास्थलमा पुगिरहेका थिए।
पार्टीका नेताकार्यकर्ता रातो टीका र फूलमाला लगाएर विजयोत्सव मनाइरहेका छन्। तर, जितको खुसी भए पनि पितृशोकका कारण विजयको रातो टीका लगाउन पाएनन्। एमाले नेताहरूका अनुसार उनले माला पनि पहिरिएनन्।
नेपाली कांग्रेससँगको निकै प्रतिस्पर्धात्मक चुनावी भिडन्तमा भण्डारी २६७ मतले विजयी भए। मुख्य निर्वाचन अधिकृतको कार्यालयका अनुसार भण्डारी ११ हजार ६१३ मतका साथ प्रदेश सांसद निर्वाचित भए।
सोमबार सम्पन्न मतगणनामा निकटतम् प्रतिस्पर्धी नेपाली कांग्रेसका उम्मेदवार अभिषेकबहादुर सिंहले ११ हजार ३४६ मत पाए। उनी सुदूरपश्चिम प्रदेश सरकारका तत्कालीन आन्तरिक मामिला तथा कानूनमन्त्री पृथ्वीबहादुर सिंहका छोरा हुन्।
सिंहको सवारी दुर्घटनामा निधन भएपछि रिक्त बझाङ १(१) उपनिर्वाचन भएको थियो। यस क्षेत्रममा नेपाली कांग्रेस सिंहकै छोरालाई उम्मेदवार बनाएका थियो। तर उनी सफल हुन सकेनन्।
यसअघि चुनावमा तत्कालीन मन्त्री सिंहसँग एमालेका अफिलाल ओखेडा पराजित भएका थिए। त्यसबेला कांग्रेसका सिंहलाई नेकपा माओवादी केन्द्र र नेकपा एकीकृत समाजवादीले सघाएका थिए।
२१ फागुनमा कांग्रेस नेतृत्वको सत्तारुढ गठबन्धन फुटेपछि त्यसको २ महिनामै उपचुनावमा भण्डारीले कांग्रेसलाई पराजित गरेका हुन्।
०७४ को चुनावयता एमालेले बझाङमा संसदीय चुनाव जित्न सकेको थिएन। त्यसबेला वाम गठबन्धनका साझा उम्मेदवार एमालेका भैरवबहादुर सिंह विजयी भएका थिए।
त्यसपछि ०७९ को चुनावमा एमालेका ऐन महर नेकपा एकीकृत समाजवादी (वाम लोकतान्त्रिक गठबन्धन) का भानुभक्त जोशीसँग पराजित भए। यस क्षेत्रमा सत्तारुढ दलहरू एक्लाएक्लै चुनावी मैदानमा उत्रिएका थिए।
संघीय सरकारको नेतृत्वकर्ता नेकपा माओवादी केन्द्रका उम्मेदवार जनकबहादुर बुढाले ३ हजार ८३१ मत ल्याए। नेकपा एकीकृत समाजवादीका दिलबहादुर सिंहले २ हजार ५१४ मत ल्याउँदा राप्रपाका किशोरकुमार खड्काले २४२ मत प्राप्त गरे।
प्रदेश सभा सदस्यका लागि ११ जना उम्मेदवार चुनावी मैदानमा थिए। अन्य उम्मेदवारले सय मत पनि पुर्याउन सकेनन्।
गाविस अध्यक्ष हुँदै सांसद
भण्डारीले अनेरास्ववियुको विद्यार्थी राजनीतिबाट फड्को मार्दै एमालेको पार्टी राजनीतिमा स्थान बनाए। उनको जन्म वि.सं. २०२४ जेठ १४ गते छबिसपाथिभेरा गाउँपालिका–१ भण्डारी गाउँमा भएको थियो।
वि.सं. २०४१ सालमा एसएलसी परीक्षा सकेर अध्ययनका लागि उनी काठमाडौँ हानिए। त्यसपछि त्यतैबाट उनी एमाले निकट अनेरास्ववियुको विद्यार्थी राजनीतिमा जोडिए। पहिलो पटक उनी वि.सं. २०४२ सालमा अनेरास्ववियुमा आबद्ध भएका थिए।
उनले बीएलसम्मको अध्ययन गरेका छन्। एमाले बझाङमा कुशल संगठक, इमान्दार र अवसर नपाएको नेता मानिँदै आएका थिए।
वि.सं. २०५४ सालमा नेकपा एमालेबाट उनले तत्कालीन मटेला गाविस अध्यक्ष बनेका थिए, भण्डारी। वि.सं. २०५५ साल एमाले बझाङ जिल्ला कमिटी सदस्य बने। त्यसपछि वि.स.२०५६ सालमा गाविस राष्ट्रिय महासंघका जिल्ला अध्यक्ष निर्वाचित भए।
वि.सं. २०६९ सालमा एमाले जिल्ला कमिटी सचिव बनेका भण्डारी अहिले एमाले बझाङको अध्यक्ष छन्। पहिलो पटक संसदीय चुनावमा टिकट पाएका उनी पहिलो प्रयासमै सफल भए। एक पटक फेरि भण्डारी २७ वर्षपछि जनप्रतिनिधिको हैसियतले जनताको सेवा गर्ने स्थानमा पुगेका छन्।
Shares
प्रतिक्रिया