युनिकोड
दशैँ शुरू भएसँगै गोँगबुस्थित नयाँबसपार्कमा घर जाने यात्रुको भीड लागेको छ।
सरकारले दशैँका लागि अग्रिम टिकट बुकिङ खुला गरे पनि घटस्थापनादेखि नै अधिकांश विद्यालय, कलेज र संघसंस्था बन्द भएपछि शनिबारदेखि नै घर जाने यात्रुको घुइँचो लागेको हो।
नयाँबसपार्क व्यवस्थापनको जिम्मा लिएको ल्होत्से बहुउद्देश्यीय प्रालिका प्रवक्ता पंकज मल्लले हाल दैनिक २५ हजारभन्दा बढी यात्रु बाहिरिन थालेको बताए।
‘लामो तथा मध्यम दूरीका सवारीसाधनमा अत्यधिक भीड लागेको छ,’ उनले भने, ‘हामीले अहिले नयाँबसपार्कबाट बस छुट्ने समयसमेत अन्य समयभन्दा अगाडि सारेका छौँ।’
दशैँका लागि हालसम्म भने ६० हजार यात्रुले अग्रिम टिकट काटिसकेको ल्होत्से बहुउद्देश्यीय प्रालिका महाप्रबन्धक सुनिल कुँवरले बताए। उनले दशैँका समयमा सहज रूपमा यात्रुलाई गन्तव्यस्थलसम्म पुर्याउने ध्येय ल्होत्से बहुउद्देश्यीय प्रालिले बसको व्यवस्थापन गरिरहेको उल्लेख गरे।
सरकारले दशैँको यातायात व्यवस्थापनलाई सहज बनाउनका लागि असोज २६ गते देशैभरका सार्वजनिक सवारीसाधनमा रुट परमिटसमेत खुला गरिसकेको छ।
नेपाल यातायात व्यवसायी राष्ट्रिय महासंघका वरिष्ठ उपाध्यक्ष सरोज सिटौलाले अहिलेको अवस्था हेर्दा विगतका वर्षभन्दा धेरै यात्रु बाहिरिने अनुमान रहेको बताए। यात्रुलाई सहज रूपमा गन्तव्यस्थल जानका लागि महासंघले केही बससमेत थप गरेको उनको भनाइ छ।
ट्राफिक प्रहरीले उपत्यकाबाट बाहिरिने यात्रुको सहजताका लागि उपत्यकाका विभिन्न १५ स्थानमा यात्रु सहायता कक्षसमेत सञ्चालन गरेको छ। उक्त सहायता कक्षबाट भाडादर, यात्रुलाई परेको समस्या सम्बोधन हुनेछ। रासस
प्रतिक्रिया