आज (आइतबार) बिहानैदेखि देशभरको मौसम बदलीसँगै विभिन्न स्थानमा वर्षा भएको छ। अहिले पनि कतिपय ठाउँमा पानी परिरहेको मौसम पूर्वानुमान महाशाखाले जनाएको छ।
यतिबेला नेपालमा पश्चिमी न्युन चापीय प्रणालीको प्रभावको कारण मौसम बदली र वर्षा भएको हो। अहिले पनि गण्डकी र लुम्बिनी प्रदेशका केही स्थान र बाँकी प्रदेशको पनि एकदुई स्थानमा हल्का वर्षा भइरहेको छ।
आज दिउँसो र साँझ काठमाडौँ उपत्यकासहित देशका धेरै ठाउँमा वर्षा भएको महाशाखाले जनाएको छ। मधेस र कोसी प्रदेशबाहेक देशका पाँचवटै प्रदेशमा आज वर्षा भएको हाे।
महाशाखाले आइतबार साँझ जारी गरेको मौसम बुलेटिनका अनुसार आज सबैभन्दा धेरै वर्षा कास्कीको लुम्लेमा भएको छ। लुम्लेमा आज १५ दशमलव २ मिलिमिटर वर्षा भएको छ।
लुम्लेपछि आज जुम्लामा धेरै पानी परेको छ। जुम्लामा आज १४ दशमलव ५ मिलिमिटर वर्षा भएको छ भने नेपालगञ्जमा १४.२ मिलिमिटर वर्षा भएको छ।
त्यसैगरी डडेलधुरामा १३.५, धनगढीमा ११.२, दिपायलमा १०.७, घोराहीमा १०.६, विरेन्द्रनगरमा ९.९, भैरहवामा ७, काठमाडौँमा ५.७, पोखरामा ३.४, ओखलढुंगामा १ र जोमसोममा १ मिलिमिटर वर्षा भएको मौसम पूर्वानुमान महाशाखाले जनाएको छ।
आज राति पनि देशभर आंशिकदेखि साधारणतया बदलीको अवस्था रहने र कतिपय ठाउँमा वर्षा हुने अनुमान महाशाखाको छ।
मौसमविद्का अनुसार १० मिलिमिटरसम्मको वर्षालाई हल्का र त्यस भन्दा माथिको वर्षालाई मध्यम वर्षा भनिन्छ।
आज लुम्ले, जुम्ला, नेपालगन्ज, डडेलधुरा, धनगढी, दिपायल, घोराही लगायतका ठाउँमा मध्यम स्तरको वर्षा भएको छ।
Shares
प्रतिक्रिया