कुटपिट गरी छिमेकीको हत्या गर्ने दुई जना पक्राउ

रौतहटमा कुटपिट गरी छिमेकीको हत्या गर्ने दुई जनालाई प्रहरीले पक्राउ गरेको छ।

प्रहरीले हत्याको आरोपमा रौतहट वृन्दावन नगरपालिका–७, सखुवा धमौरा बस्ने १९ वर्षीय विकास पासवान र सोही स्थानका ५५ वर्षीय बिन्द पासवानलाई पक्राउ गरेको हो।

विकास सहितको टोलीले सोमबार मादक पदार्थ सेवन गरी घर फर्कने क्रममा स्थानीय अमिरी पासवानलाई कुटपिट गरी धकेलेर घाइते बनाएका थिए। 

गम्भीर घाइते  भएका अमिरीको गरुडास्थित सिटी अस्पतालमा उपचारका क्रममा राति सवा ८ बजे मृत्यु भएको प्रहरीले जनाएको छ।

मृतको शव पोस्टमार्टमका लागि गौर पठाइएको र घटनाका बारेमा थप अनुसन्धान भइरहेको प्रहरीले जनाएको छ।