युनिकोड
मधेस प्रदेशलाई पराजित गर्दै नेपाल पुलिस क्लबले प्रधानमन्त्री कप एक दिवसीय राष्ट्रिय क्रिकेट प्रतियोगितामा अपराजित यात्रालाई कायम राखेको छ।
बुधबार भएको खेलमा पुलिस क्लबले मधेश प्रदेशमाथि ६ विकेटको जित निकाल्दै अंक तालिकाको शीर्ष स्थानमा यथावत छ।
प्रधानमन्त्री कपका ५ खेलबाट १० अंक जोडेको पुलिस क्लब मात्र जारी प्रतियोगितामा अपराजित टोली हो।
मधेसले दिएको ९७ रनको सामान्य लक्ष्य पुलिस क्लबले १८.३ ओभरमा ४ विकेटको क्षतिमा भेट्टायो।
पुलिसका लागि सुनिल धमालाले सर्वाधिक २८ रन बनाए। कुशल भुर्तेल १९ रन बनाउँदा बोल्ड आउट भए।
अमित श्रेष्ठले १५ र आरिफ शेख १६ रनमा अविजित रहे। अर्जुन साउद ७ र दिलिप नाथ ४ रनमा पवेलियन फर्के। मधेसका लागि रन्जित कुमार र अरनिको यादवले समान २ विकेट झारे।
त्यसअघि माथिल्लो मूलपानी क्रिकेट मैदानमा पुलिस क्लबले टस जितेर फिल्डिङ रोजेपछि ब्याटिङ गरेको मधेश प्रदेशले २४ ओभरमा ९६ रन बनाउँदा अलआउट भयो।
मधेसका लागि अरनिको यादवले २३ र कप्तान हरिशंकर शाहले २२ रन बनाए। अविशेक तिवारी ११ रनमा नटआउट रहे। अन्य ब्याटरले दोहोरो अंकको स्कोर छुन सकेनन्।
मधेसलाई कम स्कोरमा रोक्न पुलिसका लागि सागर ढकालले ५ विकेट लिए। ९ ओभरमा ४१ रन खर्चर्दै उनले ५ विकेट झारे।
ललित राजवंशीले ५ ओभरमा २ मेडन राख्दै १२ रन दिदा ४ विकेट झारे। रसिद खानको नाममा एक विकेट रह्यो।
प्रतिक्रिया