युनिकोड
प्रधानमन्त्री कप राष्ट्रिय क्रिकेट प्रतियोगिताका लागि पोखरामा सुरु प्रदेश स्तरीय छनोट प्रतियोगितामा कास्की जिल्लाले विजयी सुरुवात गरेको छ।
गण्डकी प्रदेश क्रिकेट संघको आयोजनामा शुक्रबार भएको खेलमा कास्कीले स्याङजा जिल्लालाई ७ विकेटले पराजित गर्यो। स्याङजाले दिएको १ सय २० रनको सामान्य लक्ष्य कास्कीले २८ दशमलव ४ ओभरमा ३ विकेटको क्षतिमा भेट्टायो। कास्कीको जितमा अभिषेक थापा ४३ तथा सुदिप पौडेल २१ रनमा अविजित रहे। अर्जुन कुमालले २२ रन जोडे।
त्यसअघि टस जितेर पहिले ब्याटिङ गरेको स्याङजाले ३८ दशमलव ५ ओभरमा सबै विकेट गुमाएर १ सय १९ रनको योगफल तयार पारेको थियो। स्याङजाका लागि विष्णु पाण्डेले ४१ तथा सौजन्य रेग्मीले २६ रन जोडे।
स्याङजालाई कम स्कोरमा रोक्न कास्कीका विश्व कार्की र सुवास भण्डारीले समान तीन विकेट झारे। खेलको म्यान अफ दि म्याच कार्कीले ५ ओभरमा १ मेडन राख्दै १५ रन खर्चे। कृष्ण पौडेल, अमृत गुरुङ्ग, र विपिन खत्रीको नाममा समान १ विकेट रह्यो।
प्रतियोगितामा भोलि शनिबार तनहुँ र नवलपुर भिड्नेछन्। प्रतियोगिताको उद्घाटन राष्ट्रिय खेलकुद परिषदका सदस्य सचिब रमेशकुमार सिलवालले गरेका थिए।
प्रतिक्रिया