काठमाडौँ उपत्यकाको न्यूनतम तापक्रम थप तल झरेको छ।
मौसम पूर्वानुमान महाशाखाले आज बिहान ८:४५ बजे सार्वजनिक गरेको विवरणअनुसार काठमाडौँ उपत्यकाको न्यूनतम तापक्रम ४.५ डिग्री सेल्सियसमा झरेको हो। आजको आधिकारिक न्यूनतम तापक्रम यही हो।
यसअघि आजै बिहान ६:४५ बजेको मापनमा काठमाडौँ उपत्यकाको न्यूनतम तापक्रम ४.८ डिग्री सेल्सियस देखिएको थियो।
काठमाडौँ उपत्यकाको आजको न्यूनतम तापक्रम यस वर्षअन्तर्गत अहिलेसम्मकै कम भएको मौसमविद्ले बताएका छन्।
मौसम महाशाखाका मौसमविद् सञ्जीव अधिकारीका अनुसार आज काठमाडौँ उपत्यकाको अधिकतम तापक्रम १७ देखि १९ डिग्री सेल्सियसभित्र रहने अनुमान गरिएको छ।
२४ घण्टामा सबैभन्दा कम तापक्रमलाई त्यस दिनको न्यूनतम र २४ घण्टामा सबैभन्दा बढी तापक्रमलाई त्यस दिनको अधिकतम तापक्रम भनिन्छ। बिहान ८:४५ भित्र न्यूनतम तथा साँझ ५:४५ भित्र अधिकतम तापक्रम मापन गरिन्छ।
देशभरकै तापक्रम दिनप्रतिदिन ओरालो लाग्ने क्रम जारी रहेको मौसमविद्ले बताएका छन्।
यतिबेला काठमाडौँ उपत्यकाको मौसम आंशिक बदलीको अवस्थामा रहेको मौसमविद् अधिकारीले बताए।
‘माथि-माथि अलि-अलि बादल लागेको छ, तर यो पानी पार्ने खालको बादल होइन’, उनले भने, ‘आज दिनभर काठमाडौँ उपत्यकाको मौसम आंशिक बदलीकै अवस्थामा रहने अनुमान छ।’ मौसम आंशिक बदली हुँदा घाम लाग्छ।
Shares
प्रतिक्रिया