सञ्जय लीला भन्सालीको वेब सिरिज ‘हीरामन्डी : द डायमन्ड बजार’ ओटीटीमा रिलिज भएको धेरै दिन भइसकेको छ। यस शृङ्खलामा मनीषा कोइरालाले मल्लिकाजनको पात्रलाई अर्कै आभाका साथ बाँचेकी छन्। मल्लिकाजनको भूमिकामा उनको निकै प्रशंसा भइरहेको छ।
यो पात्रको भूमिका निर्वाह गर्न अभिनेत्री कोइरालाले निकै मिहिनेत गरेकी छन्।
हालै एक अन्तर्वार्तामा मनीषा कोइरालाले ‘हीरामन्डी’को सुटिङका क्रममा आफू डिप्रेसनमा रहेको बताएकी छन्। सुटिङका क्रममा उनको मानसिक स्वास्थ्यमा असर परेको थियो।
अभिनेत्री कोइराला क्यान्सरसँग लडेकी थिइन् भन्ने कुरा सबैलाई थाहा छ। यो रोगले उनको जीवनमा गहिरो प्रभाव पारेको छ। अभिनेत्रीले आफूलाई क्यान्सरले कसरी असर गर्यो र कसरी उनी डिप्रेसनको सिकार भइन् भन्ने खुलासा गरिन्।
मनीषाले भनिन्- मलाई थाहा छ शरीर र दिमागको स्वास्थ्य कसरी जोडिएको हुन्छ। ‘हीरामन्डी’को सुटिङका क्रममा म नराम्ररी डिप्रेसनमा फसेकी थिएँ। त्यस क्रममा मलाई लाग्यो कि मैले यो अवस्थाबाट कुनै न कुनै रूपमा निस्किनुपर्छ र आफ्नो स्वास्थ्यमा ध्यान दिनुपर्छ।
मनीषा कोइरालालाई सन् २०१२ मा पाठेघरको क्यान्सर भएको पत्ता लागेको थियो। उपचारका क्रममा उनको कपाल झरेको थियो।
सुरुमा उनलाई सामान्य खाना पनि विषाक्त हुन लागेको थियो, जसका कारण उनको पेट बारम्बार फुल्ने गर्दथ्यो। त्यही क्रममा उनको तौल पनि अचानक घट्न थाल्यो।
त्यसपछि मनीषाले जब मुम्बईमा आफ्नो चेकजाँच गराइन्, तब उनलाई क्यान्सर भएको थाहा भयो। उनले न्युयोर्कमा धेरैपटक केमो थेरापी गराइन्, त्यसपछि उनी निको भइन्।
Shares
प्रतिक्रिया