युनिकोड
चीनको गान्सु प्रान्त र छिमेकी छिङहाइ प्रान्तमा सोमबार मध्यरातमा गएको ६.२ म्याग्निच्युडको भूकम्पमा परी मृत्यु हुनेको संख्या १३१ पुगेको छ।
गान्सुमा १ सय १३ र छिङहाइमा १८ जनाको ज्यान गएको छ भने अहिलेसम्म ७ सयभन्दा बढी घाइते भएका छन्। भूकम्पले गान्सुमा १ लाख ५५ हजार ३ सय ९३ घरमा क्षति पुगेको छ।
चीनले भूकम्पका लागि राष्ट्रिय प्रकोप-राहत आपत्कालीन प्रतिक्रियास्तर २ मा स्तरोन्नति गरेको छ। भूकम्प प्रभावित क्षेत्रमा केन्द्रीय संस्थाका परियोजनाबाट ७३६ भन्दा बढी उद्धारकर्ता र नजिकैका क्षेत्रमा २ हजार ४२ अग्निनियन्त्रक पठाइएको आपत्कालीन व्यवस्थापन मन्त्रालयले जनाएको छ।
मंगलबार बेलुका ७ बजेसम्म ७४ जनाको उद्धार गरिएको छ। त्यस्तै मंगलबार नै गान्सु र छिमेकी छिङहाइ प्रान्तमा भूकम्पबाट प्रभावितलाई आधारभूत आवश्यकता पूरा गर्न १ लाख ३३ हजार ५ सय राहत सामग्री पठाइएको छ।
भूकम्पले नराम्ररी प्रभावित क्षेत्र जोड्ने सबै ग्रामीण राजमार्गमा साँझ ७ बजेदेखि आवागमन सुचारु गरिएको छ। गान्सु र छिङहाइका सबै द्रुतमार्ग साथै राष्ट्रिय र प्रादेशिक ट्रंक सडकहरू सुचारु रूपमा सञ्चालन भइरहेका छन्। राहत कर्मचारी, आपूर्ति र सवारी साधनहरू विपद् प्रभावित क्षेत्रमा निर्वाध रूपमा पुग्न सक्ने यातायात मन्त्रालयले जनाएको छ। भूकम्प प्रभावित क्षेत्रमा विद्युत् आपूर्ति सुचारु गर्न पनि प्रयास भइरहेको बताइएको छ। -सिन्ह्वा/नान
प्रतिक्रिया