हङकङ : ढलभित्र भेटियो प्लास्टिकले बेरेको अवस्थामा पुरुषको शव

बुधबार बिहान क्यासल पिक रोडको नालामा एक पुरुषको शव भेटिएको छ।

सामचेङस्थित गार्डेन कम्पनी प्लाननजिकै सडकमा कालो प्लास्टिकको झोलामा बेरिएको अवस्थामा ढलभित्र शव फेला परेको प्रहरीलाई उद्धृत गर्दै स्थानीय सञ्चारमाध्यमले जनाएका छन्।

उक्त ढल तीन मिटर गहिरो रहेको छ।

स्रोतलाई उद्धृत गर्दै समाचारमा जनाइएअनुसार सीएलपी समूहका कामदारले बिहान ११ बजे ढलभित्र शव भेटेपछि प्रहरीलाई खबर गरेका थिए।

प्रहरीले मृतकको व्यक्तिगत सामान पनि ढलभित्र फेला परेको जनाएको छ। मृत व्यक्ति ७० वर्षको रहेको बताइएको छ।

घटनाबारे प्रहरीले अनुसन्धान गरिरहेको छ।