युनिकोड
राष्ट्रिय प्रजातन्त्र पार्टी (राप्रपा)का अध्यक्ष राजेन्द्र लिङ्देनले सबै राजनीतिक दल र विचार मिलेर मात्रै देशले निकास पाउने जनादेश प्राप्त भएको बताएका छन्।
प्रतिनिधिसभाको पहिलो बैठकलाई सम्बोधन गर्दै उनले मंसिर ४ को निर्वाचनबाट सबै राजनीतिक दल र विचार मिलेरमात्रै देशले निकास पाउने जनादेश प्राप्त भएको बताएका हुन।
‘सबै राजनीतिक दलहरु र सबै विचार मिलेरमात्र यो देशको निकास हुन सक्छ। यो समस्याको समाधान हुन सक्छ भन्ने जनादेश छ,’ लिङ्देनले भने, ‘र, मलाई विश्वास छ हामी आगामी दिनमा जनताको अभिमतलाई सम्मान गर्दै अगाडि जान सक्षम हुनेछौँ।’
उनले जनताले कुनै एउटा दलमाथि पूर्ण विश्वास गर्न नसकेको पनि बताए। कुनै पनि राजनीतिक दल एक्लै अगाडि जान नसक्ने र कसैले पनि कुनै दल र विचारलाई निषेध गरेर जान नसक्ने लिङ्देनको भनाइ थियो।
‘अहिलेको संसद, अहिलेको जनादेशलाई हामीले हेर्यौँ भने यो संसद् एउटा यस्तो जनादेशको प्रतिविम्ब छ कि जनताले कुनै एउटा दलमाथि पूर्ण विश्वास गर्न सकेन,’ उनले भने, ‘र, यो जनादेशले भन्यो कि तिमी कुनै पनि राजनीतिक दल एक्लै अगाडि जान सक्दैनौं र कुनै पनि राजनीतिक दल र विचारलाई निषेध गरेर जन सक्दैनौं।’
प्रतिक्रिया