नेकपा एमालेका उपाध्यक्ष विष्णु पौडेलले एमालेले चाहे केही दिनमै गठबन्धन भत्काउन सक्ने दाबी गरेका छन्।
शुक्रवार प्रेस चौतारी नेपालले कैलालीमा आयोजना गरेको पत्रकार सम्मेलनमा बोल्दै उनले यस्तो दाबी गरेका हुन्।
उपाध्यक्ष पौडेलले आफ्नो पार्टी अहिले गठबन्धन भत्काएर नयाँ गठबन्धन बनाउने धन्दामा नरहेको भन्दै एमालेले गठबन्धन भत्काउने महसुस गरे केही हप्ताको मात्रै खेल रहेको बताए।
‘अहिले म तिथिमितितिर जान्न । मैले यति भने की हामी अहिले यो गठबन्धन भत्काउने, अर्को गठबन्धन बनाउने त्यो काममा लागेका छैनौँ, एमाले लाग्यो भने त्यो केही दिनको विषय हो', उनले भने, 'यसरी वा त्यसरी जे होस् कुनै पनि गठबन्धन भत्काएर अर्को गठबन्धन बनाउने धन्दामा हामी लागेका छैनौँ । यदी एमालेले त्यो आवश्यक्ता महशुस गर्यो भने केही हप्ताको काम हुन्छ।’
उपाध्यक्ष पौडेलले पार्टीका नेता भीम रावलले एकपछि अर्को गल्ती गर्दै गइरहेको आरोप लगाए।
उनले पार्टीको अनुशासनमा नबस्ने र पार्टी सदस्यको कर्तव्य निर्वाह नगरेको बताए। उपाध्यक्ष पौडेलले नेता रावलले पार्टीलाई कमजोर बनाउने गतिविधि गरेको बताए।
‘भीम रावलजीले पार्टीको अनुशासनअनुसार जिम्मेवार सदस्यले निर्वाह गर्ने कर्तव्य पूरा गर्नु भएको छैन। उहाँ विगतमा लामो समयसम्म पार्टीको नेतृत्वमा रहेर काम गरेको पदाधिकारी हो। उहाँले पार्टी सदस्यको कर्तव्य निर्वाह गर्नुभएको छैन', पौडेलले भने, 'पार्टीको निर्णय मान्नुभएको छैन। उहाँले पार्टीको अनुशासन उल्लंघन गर्नुभएको छ। उहाँबाट पार्टीलाई कमजोर पार्ने गतिविधि भइरहेका छन्, एकपछि अर्को गल्ती गर्नुभएको छ।’
उपाध्यक्ष पौडेलले आउने निर्वाचनमा नेकपा एमालेको एकल सरकार निर्माण गर्ने तयारीमा आफू लागेको बताए। उहाँले वर्तमान संसदले ५ वर्षको समय पूरा गर्ने लक्षण नदेखेको बताए।
Shares
प्रतिक्रिया