युनिकोड
राप्रपा नेपालका अध्यक्ष कमल थापाले नेपालका प्रमुख राजनीतिक दल र सञ्चारमाध्यमलाई गम्भीर आरोप लगाएका छन्।
देशमा राजसंस्था पुनःस्थापनाको औचित्य पुष्टि गर्न उनले प्रमुख राजनीतिक दलका शीर्ष नेता र मिडियालाई विदेशी पैसाका लागि स्वाभिमान र आत्मसम्मान बेचिरहेको आरोप लगाएका हुन्।
पार्टीको एकता महावधिवेशनमा राजेन्द्र लिङ्देनसँग हार्दै राष्ट्रिय प्रजातन्त्र पार्टी (राप्रपा) को नेतृत्वबाट बाहिरिएपछि राजा र राजसंस्थाको एजेन्डा छाडेको घोषणा गर्दै राप्रपा नेपाल पुनः गठन गरेका थापा पछिल्लो समय राजतन्त्र पुन:स्थापनाकै एजेन्डामा फर्किएका छन्।
त्यसैको कारण बताउने क्रममा उनले प्रमुख राजनीतिक दलका शीर्ष नेता र स्थापित सञ्चारमाध्यमविरुद्ध आक्षेप लगाएका हुन्।
‘राजाप्रतिको मेरो गुनासो, असन्तुष्टि आफ्नो ठाउँमा छ। तर, जब देशका प्रमुख राजनीतिक दलका शीर्ष नेताहरू र कतिपय चल्तीका आमसञ्चार माध्यमहरू समेत आफ्नो स्वाभिमान र आत्मसम्मानलाई विदेशीको पैसासँग साटिरहेको देख्छु, म अत्यन्त चिन्तित हुन्छु’, बिहीबार थापाले सामाजिक सञ्जालमा लेखेका छन्, ‘अनि नेपालमा राजसंस्थाको अपरिहार्यता महसुस गर्दछु।’
प्रतिक्रिया