युनिकोड
प्रदेश २ सरकारको ‘प्रदेश निजामती सेवाको गठन, सञ्चालन र सेवा शर्त’ सम्बन्धमा व्यवस्था गर्न बनेको विधेयक प्रमाणीकरण भएको छ।
प्रदेशसभाबाट २०७७ कात्तिक ३ गते पारित भएको उक्त विधेयक प्रदेश नं २ का प्रदेश प्रमुख तिलक परियारले बुधबार प्रमाणीकरण गरेका हुन्। यो विधेयक प्रमाणीकरण भएपछि प्रदेश २ सरकारलाई निजामती कर्मचारी भर्ना गर्न बाटो खुलेको छ।
उक्त विधेयक गत माघ १६ गते प्रदेश प्रमुख कार्यालयमा दर्ता भएको थियो।
सो विधेयकलाई नेपालको संविधानको धारा २०१ को उपधारा २ बमोजिम प्रदेश प्रमुख परियारले प्रमाणीकरण गरेको उनका स्वकीय सचिव पदम विश्वकर्माले जानकारी दिए।
उनका अनुसार यी विधेयकसँगै प्रदेश प्रमुख परियारबाट प्रमाणीकरण भएको विधेयकको संख्या १७ पुगेको छ भने प्रदेश प्रमुखको कार्यालयबाट प्रमाणीकरण गरिएका हालसम्मको विधेयकको संख्या जम्मा ३९ पुगेको छ।
लामो समयदेखि पेन्डिंगमा रहेको उक्त विधेयक प्रमाणीकरण भएपछि प्रदेश सरकारले यसलाई ठूलो सफलताको रुपमा लिएको छ।
प्रदेश २ का मुख्यन्यायाधिवक्ता दिपेन्द्र झाले यो विधेयक प्रमाणीकरण हुनुलाई एतिहासिक सफलता हासिल भएको भन्दै अब यो विधेयकले प्रदेशलाई स्वायत्त र अधिकार सम्पन्न बनाइ विकासको दिशामा अघि बढ्न बाटो खुलेको प्रतिक्रिया दिएका छन्।
प्रतिक्रिया