युनिकोड
बैतडीमा सेती नदी गाउँ पस्दा बाढीमा फसेका ५० जनाको उद्धार हुन सकेको छैन। सोमबार राती करिब ११ बजेतिर नदी बस्तीमा पस्दा बाढीमा फसेका ५० जना उद्धारको पर्खाइमा रहेका छन्।
उनीहरुको उद्धारको लागि गएको नेपाली सेनाको हेलिकप्टर अवतरण गर्न नसकेर फर्किएको सुदूरपश्चिम प्रदेश प्रहरीका प्रवक्ता एसएसपी विक्रम चन्दले बताए।
‘हेलिकप्टर गएको थियो तर उनीहरुको उद्धार हुन सकेको छैन’ उनले भने, ‘हेलिकप्टर अहिले फिर्ता भएको छ।’
बाढी बस्ती पसेको सिगास गाउँपालिका–५ को ढुंगाड बस्ती सम्पर्क बाहिर छ। सोमबार रातीदेखि नेपाल टेलिकमको नेटवर्क छैन।
ढुंगाडमा सम्पर्क गर्न सकिने एनसेलले पनि काम नगरेपछि बाढीमा फसेका स्थानीयहरुसँग सम्पर्क हुन नसकेको बैतडी प्रशासनले जनाएको छ। ४-५ घण्टाको दूरीमा रहेको शिवलिङ प्रहरी चौकीबाट ६ जना प्रहरीको टोली ढुंगाडतर्फ गएको छ।
सोमबार राति नै ढुंगाडमा दर्जनौं घर डुबानमा परेको खबर आएको थियो। मोबाइल फोनले काम नगर्दा यकिन विवरण भने अहिलेसम्म पनि प्राप्त हुन सकेको छैन।
प्रतिक्रिया