पश्चिमका जिल्लामा आज पनि भारी वर्षाको संभावना, पूर्वमा क्रमिक सुधार

पश्चिम नेपालका जिल्लाहरुमा भारी वर्षाको संभावना कायमै रहेको जल तथा मौसम विज्ञान विभागको मौसम पूर्वानुमान महाशाखाले जनाएको छ। 

सुदूरपश्चिम र कर्णाली प्रदेशमा भारी वर्षाको संभावना कायम रहेको र लुम्बिनी र गण्डकी प्रदेशका अधिकांश जिल्लाहरुमा पनि मध्यम वर्षा जारी रहने मौसमविद सन्जिव अधिकारीले जानकारी दिए। 

‘आज पनि कर्णाली, सुदूरपश्चिम प्रदेशमा भारी वर्षाको संभावना रहन्छ,’ अधिकारीले नेपालखबरसँग भने, ‘लुम्बिनी र गण्डकी प्रदेशका एक दुई स्थानमा पनि भारी वर्षा हुने संभावना देखिन्छ।’

बागमती प्रदेशसहित पूर्वका जिल्लाहरुमा भने क्रमिक रुपमा मौसम सुधार हुने अधिकारीले जानकारी दिए। ‘बागमती, प्रदेश १ र मधेश प्रदेशमा भने भारी वर्षाको संभावना छैन,’ उनले भने, ‘तर, आंशिकदेखि मध्यम वर्षाको संभावना भने त्यहाँ पनि देखिन्छ।’

अबको ३ दिन पूर्ण रुपमा वर्षा रोकिने संभावना भने नभएको विभागले जनाएको छ। 

शुक्रबार राती भने कर्णाली प्रदेश र सुदुरपश्चिम प्रदेशमा सामान्य देखि पुर्ण बदली र बांकी प्रदेशहरुमा आंशिक देखि सामान्य बदलि रहने विभागले जनाएको छ। 

कर्णाली र सुदूरपश्चिम प्रदेशहरूका धेरै र बाँकी प्रदेशका थोरै  स्थानहरूमा मेघ गर्जन चट्याङ्ग सहित भारी वर्षाको सम्भावना रहेको विभागले जनाएको छ।