बालुवाटार जग्गा प्रकरणमा पक्राउ परेका बन्दीको रिट निवेदन सुनुवाइ गर्न आज (शुक्रबार) का लागि पेसी तोकिएको छ।
सर्वाेच्च अदालतका न्यायाधीशद्वय आनन्दमोहन भट्टराई र हरिप्रसाद फुयाँलको इजलासमा पेसी तोकिएको हो।
यसअघि बिहीबार न्यायाधीश विश्वम्भरप्रसाद श्रेष्ठ र कुमार रेग्मीको इजलासमा पेसी तोकिए पनि उनीहरूले हेर्न नमिल्ने भएकाले सुनुवाइ हुन सकेको थिएन। त्यसपछि आजका लागि पुनः पेसी तोकिएको हो।
प्रहरीको केन्द्रीय अनुसन्धान ब्युरो (सीआईबी) ले पक्राउ गरेका ३ जनाले बन्दी प्रत्यक्षीकरणको रिट दायर गरेका छन्।
उनीहरुले आफूलाई रिहा गर्न माग गरेका छन्।
यस्तै यसअघि सर्वोच्चले नै अन्तरिम आदेश दिँदै १७ जनालाई पक्राउ नगर्न आदेश दिएको टीकाराम घिमिरेसहितको रिट पनि सँगै पेस गरिएको छ।
प्रहरीले पक्राउ गरेर जिल्ला अदालत काठमाडौंबाट हिरासतमा राख्न ७ दिन म्याद लिएपछि सुधीरकुमार शाह, धर्मप्रसाद गौतम र मीनबहादुर गुरुङका तर्फबाट सर्वोच्चमा बन्दी प्रत्यक्षीकरणको रिट दायर भएको हो।
उक्त रिटमा प्रारम्भि सुनुवाइ गर्दै न्यायाधीश कुमार चुँडालको इजलासले गत शुक्रबार २४ घण्टाभित्र लिखित जवाफ पेस गर्न विपक्षीको नाममा आदेश दिएको थियो। आदेशअनुसार प्रहरीको केन्द्रीय अनुसन्धान ब्युरोसहितका विपक्षीले लिखित जवाफ दिइसकेका छन्।
Shares
प्रतिक्रिया