पशुपतिनाथ मन्दिरको गर्भगृहमा स्थापित जलहरीमुनिको भागमा थप ४३ तोला सुन शुक्रबार बिहान भेटिएको छ।
जलहरी राखिएको गर्भगृहको भुइँको भाग खोतलेर बढार्ने क्रममा उक्त परिमाणको सुन भेटिएको हो।
पशुपति क्षेत्र विकास कोषका निर्देशक डा. घनश्याम खतिवडाले सुन खोज्ने क्रम जारी रहेको नेपालखबरलाई बताए। तर उनले कति परिमाणमा थप सुन भेटिएको विषयमा खुलाउन चाहेनन्।
‘केही सुन जहलरीमुनिको भागमा सफाइ गर्ने क्रममा भेटिएको छ। तर कति परिमाण हो भन्ने अहिले एकिन भइसकेको छैन’, उनले नेपालखबरलाई भने, ‘हामी खोजबिन गरिरहेका छौँ। भरेसम्म कति परिमाण भन्ने एकिन हुन सक्छ।’
पशुपतिको गर्भगृहमा लगाइएको १०७ केजी ९२४.७४ ग्राम सुनबराबरको जलहरीको हिसाब अझै मिल्न सकेको छैन। तत्कालीन प्रधानमन्त्री केपी शर्मा ओलीको पालमा लगाइएको सुनको जलहरीको हिसाब नमिलेपछि अख्तियार दुरुपयोग अनुसन्धान आयोगले पनि छानबिन गरिरहेको छ।
अख्तियारले जलहरी निकालेर जोख्दा करिब आधा केजी सुन नपुगेको पाइएको थियो। तर त्यसअघि नेकपा माओवादी केन्द्रका सांसदहरुले जहलरीको १० केजी सुन गायब गरेर भ्रष्टाचार गरिएको आरोप लगाएका थिए।
जलहरीमा प्रयोग भएको सुनको हिसाब नमिलेपछि अझै खोजबिन भइरहेको छ। त्यहीक्रममा गर्भगृहबाट थप ४३ तोला सुन निकालिएको हो।
गत साता मात्रै अख्तियार दुरुपयोग अनुसन्धान आयोगले नेपाली सेना, नेपाल प्रहरी, सशस्त्र प्रहरी, राष्ट्रिय अनुसन्धान विभाग, पुरातत्व विभाग, गुठी संस्थान र सुन चाँदी व्यवसायी संघका प्रतिनिधिलाई राखेर जलहरीको सुन जोखेको थियो। त्यसबेला करिब आधा केजी सुन अपुग पाइएको थियो।
सम्बन्धित समाचार
- पशुपतिमा अख्तियारको टोली, अन्य सबैलाई निकालेर चारै ढोका बन्द गरियो
- पशुपतिमा अख्तियार आउने भएपछि...(तस्बिरहरू)
- जलहरी प्रकरण : छानबिनका लागि पशुपतिमा पुग्यो अख्तियारको टोली
- पशुपतिको जलहरीमा लगाइएको सुन जोख्दै अख्तियार
- पशुपतिमा जलहरी विवाद : अख्तियारले जोख्दा आधा केजी कम भेटियो
- ‘पशुपतिको जलहरीमा सुन कम भए फाँसीमा चढ्न तयार छु’
Shares
प्रतिक्रिया