२९ औँ महानगर दिवसको अवसरमा काठमाडौँ महानगरपालिकाका जनप्रतिनिधि र कर्मचारीबीच मैत्रीपूर्ण फुटबल सम्पन्न भएको छ। त्रिपुरेश्वरस्थित दशरथ रंगशालामा सोमबार बिहान भएको खेलमा महानगर प्रमुख बालेन्द्र शाह नेतृत्वको टीमलाई कर्मचारीको टीमले ५ गोल हानेको छ।
खेलमा जनप्रतिनिधिको नेतृत्व प्रमुख बालेन्द्र शाह (बालेन) र कर्मचारीको नेतृत्व प्रमुख प्रशासकीय अधिकृत बसन्त अधिकारीले गरेका थिए।
कर्मचारीकातर्फबाट जीवन थापाले ३ गोल र सविन लामाले २ गोल गरेका थिए। यस्तै, जनप्रतिनिधिका तर्फबाट प्रेम थापाले १ गोल र नविन भण्डारीले २ गोल गरेका थिए।
महानगर दिवस, प्रतियोगिता सञ्चालन उपसमितिले खेलको आयोजना गरेको हो।
खेलको सुरुवात गर्दै राष्ट्रिय खेलकुद परिषदका सदस्य सचिव टंकलाल घिसिङ्ले रेफ्री ओम न्पौपानेलाई र रेफ्री न्यौपानेले महानगरका प्रमुख शाह र उपप्रमुख एवं महानगर दिवस मूल समारोह समितिकी संयोजक सुनिता डंगोललाई फुटबल हस्तान्तरण गरेका थिए।
जनप्रतिनिधि र कर्मचारी बिचको मैत्री खेल उदाहरण भएको महानगरले जनाएको छ। यसले आन्तरिक समन्वयलाई बिम्बित गर्ने विश्वास महानगरले लिएको छ।
महानगर दिवसका कार्यक्रमअन्तर्गत २७ गते बाँसुरी बादन प्रतियोगिता, २८ गते गुरु सम्मान र २९ गते मूल समारोह हुने महानगरपालिकाले जानकारी गराएको छ।
Shares
प्रतिक्रिया