आज पहाडी क्षेत्रका एक-दुई स्थानमा हल्का वर्षाको सम्भावना छ : मौसमविद्

आज (बिहीबार) पहाडी भेगका एक दुई स्थानमा हल्का वर्षाको सम्भावना रहेको मौसम पूर्वानुमान महाशाखाका मौसमविद्ले बताएका छन्।

अहिले भने पहाडी क्षेत्रमा आंशिक बदली छ भने देशका बाँकी स्थानमा मौसम सामान्यतया सफा छ।

तर दिउँसो पहाडी भेगका एक वा दुई स्थानमा हल्का वर्षाको सम्भावना रहेको मौसमविद् सजिना शाक्यले नेपालखबरलाई जानकारी दिइन्।

उनका अनुसार अहिले (बिहीबार बिहान ८:३० बजे) काठमाडौं उपत्यकाको तापक्रम १५ डिग्री सेल्सियस छ। ‘पौने ९ बजे हामी पुनः अपडेट लिन्छौं,’ मौसमविद् शाक्यले भनिन्।

उनका अनुसार देशका कुनै पनि स्थानमा तापक्रम शून्य वा माइनसमा झरेकाे छैन। बुधबार सबैभन्दा कम जुम्लामा १ डिग्री सेल्सियस न्यूनतम तापक्रम देखिएको थियो।