कुशल भुर्तेलले आक्रामक पारी खेलेपछि साविक विजेता पोखरा पल्टनले आइतबारबाट शुरु भएको पोखरा प्रिमियर लिग(पीपीएल)को उद्घाटन खेलमा काठमाडौं गोल्डन्स वारियर्समाथि ९ विकेटको शानदार जित हात पारेको छ।
पोखरा रंगशाला क्रिकेट मैदानमा भएको खेलमा ओपनर भुर्तेलले ४३ बलमा ४ चौका र ५ छक्कासहित ६५ रनको अर्धशतकीय इनिङ्स खेलेपछि काठमाडौंले दिएको १ सय १६ रनको लक्ष्य पोखराले १४.१ ओभरमा १ विकेट गुमाएर भेट्टायो।
यस्तै पोखराका रविइन्दर सिंहले ३८ रन जोडे। ३२ बलमा उनले ५ चौका र १ छक्का प्रहार गरे। उसका अर्का ओपनर आसिफ शेख १४ रनमा आउट भएका थिए।
त्यसअघि सुबोध भाटीले २९ बलमा ४ चौका र ४ छक्कासहित ४५ रनको इनिङ्स खेलेपछि काठमाडौंले निर्धारित २० ओभरमा ८ विकेट गुमाएर १ सय १५ रन बनाएको थियो।
काठमाडौंका लागि भाटीबाहेक गौरव तमोरले १३ र सुशान भारीले १० रन जोडे। त्यसबाहेक अरुले दोहोरो रन जोड्न सकेनन्।
कप्तान ज्ञानेन्द्र मल्ल १, जयकिशन कोल्सावाला ९, सुवास खकुरेल र पवन सर्राफ ६, पृथु बास्कोटा ७ रनमा आउट भए।
पोखराका ललितनारायण राजवंशी, कुशल मल्ल र रासिद खानले २-२ विकेट लिए।
प्रतिक्रिया