विवादमा पर्‍यो ९ करोडको आर्थिक प्रतिवेदन, छानबिन समिति बनाइँदै

नेपाल क्रिकेट संघ (क्यान) को नयाँ नेतृत्व चयनका लागि बन्द सत्र सुरु हुनुअघि आर्थिक प्रतिवेदनलाई लिएर विवाद भएको छ।

क्यानको साधारण सभाअघि कार्य समितिमा कोषाध्यक्ष रोशनकुमार सिंहले आर्थिक प्रतिवेदन देखाउँदा विवाद भएको हो।

कोषाध्यक्ष सिंहले क्यानको साधारण सभामा करिब ९ करोड रुपैयाँको आर्थिक प्रतिवेदन पेस गर्ने तयारीमा थिए। 

तर उनले साधारण सभामा सिंहले आर्थिक प्रतिवेदन पेस गर्नुअघि नै विवादित बनेको हो। आर्थिक प्रतिवेदनमाथि कार्यसमितिमा बिहीबार र शुक्रबार छलफल भएको हो।

आर्थिक प्रतिवेदनमा कुरा नमिलेका कारण नयाँ कार्यसमिति चयन गर्न बोलाइएको बन्द सत्र पनि ढिला गरी सुरु भएको छ।

उनले पेस गरेको आर्थिक प्रतिवेदनमा साधारण सभामा सहभागी सदस्यहरु सन्तुष्ट हुन सकेनन्। प्रतिवेदन विवादित हुँदा साधारणसभामा पेस गरेर पारित हुन सकेको छैन।

बिहीबार राति र शुक्रबार दिनभर पटक पटक बसेको क्यानको बोर्ड बैठकमा प्रतिवेदनलाई लिएर विवाद चर्किएको थियो। 

एक पदाधिकारीका अनुसार बोर्ड बैठकमा विवाद भएपछि लेखा परीक्षकलाई नै झिकाउनुपर्ने अवस्था आएको हो। 

तर कोषाध्यक्ष सिंहको प्रतिवेदनमा सदस्यहरुबीच विवाद भएको थियो। आर्थिक प्रतिवेदनमा कुरा नमिलेपछि छानबिन समिति नै बनाइने भएको छ।

क्यानका एक अधिकारीले सिंहद्वारा तयार पारिएको आर्थिक प्रतिवेदनको छानबिनका लागि समिति बनाउने गरी सहमति भएको बताएका छन्। 

क्यानको चुनाव शनिबार हुँदैछ। अध्यक्षका लागि चतुरबहादुर चन्द र विनय राजभण्डारी मैदानमा छन्। उनीहरु प्यानल नै बनाएर चुनावी तयारी गरिरहेका छन्।