युनिकोड
आईसीसी टी–२० विश्वकपको सुपर ८ मा पुग्ने सम्भावना कायम राख्न नेपालले दक्षिण अफ्रिकाविरुद्ध एक सय १६ रनको मध्यम लक्ष्य पाएको छ।
वेस्ट इन्डिजको सेन्ट भिसेन्टस्थित आर्नस भेल स्टेडियममा नेपालले टस जितेर फिल्डिङ रोजेपछि ब्याटिङ गरेको दक्षिण अफ्रिकाले निर्धारित २० ओभरमा ७ विकेटको क्षतिमा १ सय १५ रनको योगफल तयार पारेको हो।
नेपाल आजको खेलमा दक्षिण अफ्रिकाविरुद्ध पराजित भए सुपर ८ मा पुग्ने सम्भावना लगभग सकिनेछ। आजको खेलमा जित निकाले नेपालको सुपर ८ मा पुग्ने सम्भावना जीवित रहनेछ।
नेपालविरुद्ध राम्रो सुरुवात गरेको दक्षिण अफ्रिकामाथि पछिल्लो समय नेपालका बलर हाबी भए।
दक्षिण अफ्रिकाविरुद्ध नेपालका कुशल भुर्तेल र दीपेन्द्रसिंह ऐरी चम्किए। कुशलले आफ्नो स्पेलमा १९ रन दिएर चार विकेट लिए। दीपेन्द्रले आफ्नो स्पेलमा २१ रन खर्चेर ३ विकेट लिए।
दक्षिण अफ्रिकाका लागि ओपनर रिजा हेनड्रिकले सर्वाधिक ४३ रनको योगदान दिए।
दीपेन्द्रले १६ औँ ओभरको तेस्रो बलमा ओपनर हेनड्रिकलाई आफैँले क्याच लिँदै आउट गराए। उनले ४९ बलमा ५ चौका र १ छक्का हाने।
यसअघि दीपेन्द्रले नै चौथो ओभरको चौथो बलमा दक्षिण अफ्रिकाका ओपनर क्वीन्टन डी कक लाई १० रन बनाउँदा आउट गरेका थिए।
दीपेन्द्रलेले १८ औँ ओभरको तेस्रो बलमा डेविड मिलरलाई ७ रन बनाउँदा सन्दीप लामिछानेको हातबाट क्याच आउट गराए।
कुशलले १४ औँ ओभरको दोस्रो बलमा ३ रन बनाएका हेनरिक क्लासेनलाई करण केसीको हातबाट क्याच आउट गराए।
त्यसअघि कुशलले नै १२ औँ ओभरको दोस्रो बलमा नेपालका ओपनर कुशल भुर्तेलले कप्तान एडेन मक्रमलाई १० रन बनाउँदा बोल्ड आउट गर्दै पेभेलियनको बाटो देखाएका थिए।
कुशलले नै मार्को जेसन र कागिसो रवाडालाई सस्तैमा आउट गरे। दक्षिण अफ्रिकाका ट्रिस्टन स्टुब २७ रनमा अविजित रहे। नेपालले केहीबेरमा जवाफी ब्याटिङ गर्नेछ।
प्रतिक्रिया