पहिलोपटक ड्रागन वोट फेस्टिभल हुने, जहाज चार्टर गरेर पोखरा आउँदै चिनियाँ पर्यटक

सन् २०२३ को मे महीनामा नेपाल आउने पर्यटकमा भारत अमेरिका पछि चीनको तेस्रो स्थानमा छ। मेमा  ४ हजार ६६७ जना चिनीयाँ पर्यटकले नेपाल भ्रमण गरेका थिए।

दुई देशबीच रही आएको सांस्कृतिक तथा जनस्तरको सम्बन्ध सुमधर बनाउन तथा नेपालमा चिनियाँ पर्यटक बढाउने उद्देश्यले आयोजना गर्न लागिएको बताइएको छ।

ड्रागन वोट फेस्टिभल ५० भन्दा बढि देश तथा क्षेत्रहरुमा आयोजना हँदै आइरहको छ भने यो एशियएन गेममा समेत सहभागी गराइने खेल हो। नेपालमा आयोजना गर्न लागिएको यो फेस्टिवल दक्षिण एशियामै पहिलो पटक आयोजना हुन लागेको पर्यटन बोर्डले जनाएको छ।

नेपाल पर्यटन बोर्डका प्रमुख कार्यकारी अधिकृत धनन्जय रेग्मीले नेपालमा पहिलो पटक बोट फेस्टिभल हुन लागेको र हरेक वर्ष आयोजना हुने जानकारी दिए।

‘चिनियाँ पर्यटकलाई नेपालमा ल्याउन महत्वपूर्ण भूमिका रहने छ,’ सिइओ रेग्मीले भने,‘चीनबाट पहिलो पटक जहाज चार्टर गरेर पोखरा अन्तराष्ट्रिय विमानस्थलमा उडान गर्ने तयारी रहेको छ।’
 
रेसका लागि चीनबाटै नेपालको केरुङ नाका हुँदै आठ वटा विशेष खालका वोट, अन्य आवश्यक सामग्री र चीनबाट वोट रेश तथा प्रशिक्षणको लागि आउने सहभागीहरु नेपाल आइसकेका छन्।

बोर्डका अनुसार उनीहरुले पोखरा फेवातालमा प्रतियोगिताको लागि अभ्यास गरिरहेका छन्। फेस्टिवलमा नेपालका सातैवटै प्रदेश र चीनबाट आएका प्रतियोगीहरु सहभागी हुनेछन्।

कार्यक्रमको औपचारिक उद्घाटनसँगै पहिले २ सय मिटर र पछि ५ सय मिटर गरी दुई वटा सेगमेन्टमा ८ वटा वोट रेश प्रतियोगिता हुनेछ। प्रतियोगितामा विजेतालाई नगद तथा प्रमाणपत्र प्रदान गरिनेछ। यस्तै, कार्यक्रमकै अवसरमा दुवै देशका सांस्कृतिक प्रस्तुति र खाद्य प्रदर्शनी पनि हुनेछन्।

चिनियाँ दूतावासले पोखरामा अन्तर्राष्ट्रिय विमानस्थल निर्माण सम्पन्न भएर बसेको अवस्थामा यस प्रकारका कार्यक्रमले विदेशीलाई पोखरामा आमन्त्रण गर्न र विमानस्थलबाट अन्तर्राष्ट्रिय उडान सञ्चालन गर्न पनि यस कार्यक्रमले सघाउ पुग्ने अपेक्षा गरेको छ।