गायिका आस्था राउतलाई पक्राउ गर्न काठमाडौं जिल्ला प्रशासनले अनुमति दिएको छ। उनीविरुद्ध महानगरी प्रहरी परिसरमा आजै उजुरी दर्ता भएको थियो।
विमानस्थलमा चेकजाँचका क्रममा गायिका राउतले गत बुधबार ड्युटीमा रहेको प्रहरीलाई दुर्व्यवहार गरेको भन्दै प्रहरी जवान रमिशा श्रेष्ठले उजुरी गरेकी थिइन्। प्रहरीले घटनाबारे छानबिन गरेर प्रारम्भिक प्रतिवेदन बुझाएपछि प्रशासनले उनलाई पक्राउ गर्न अनुमति दिएको हो।
प्रहरीले राउतलाई फरार भनेको छ। उनीमाथि अभद्र व्यवहारसम्बन्धी कसुरमा कारबाही अघि बढाइएको छ। परिसर प्रमुख एसएसपी उत्तम सुवेदीका अनुसार गायिका राउत फरार छिन्। उनलाई प्रहरीले खोजी गरिरहेको सुवेदीले जानकारी दिए। गत बुधबार राउत भद्रपुर जाने क्रममा आन्तरिक टर्मिनलमा चेकजाँच गर्ने क्रममा प्रहरीसँग उनले चर्काचर्की गरेकी थिइन्।
उनको ज्याकेट फुकाल्न लगाएको भन्दै गायिका राउतले फेसबुकमा भिडियो सेयर गर्दै आक्रोश पोखेकी थिइन्। सोलगत्तै चेकजाँचको सीसीटीभी फुटेज भिडियो विमानस्थल प्रहरी कार्यालयले सार्वजनिक गरेको थियो। यसबारे प्रारम्भिक प्रतिवेदनपछि गायिका राउतविरुद्ध उजुरी दर्ता भएको प्रहरीले जनाएको छ।
उक्त घटनाबारे गायिका राउतले अर्को भिडियोमार्फत फेसबुकमा माफी मागिसकेकी छिन्। प्रहरीले भने उनीविरुद्ध साइबर अपराधसम्मको कारबाही अघि बढाउने तयारी थालेको छ। अभद्र व्यवहारमा १ वर्षसम्म कैद र जरिवाना हुनसक्ने कानुनी व्यवस्था छ।
प्रतिक्रिया