पढ्न उमेरले छेक्दो रहेनछ भन्ने उदाहरण पर्वतकी एक महिला नेताले देखाएकी छन्। दक्षिणी पर्वतको बिहादी गाउँपालिका–४ वहाकीकी ५० वर्षीया खगिसरा भुसालले एसईईमा सहभागी भएर त्यो भनाइ चरितार्थ गरेकी हुन्।
उनले दुई छोरा र एक छोरी जन्माएर, हुर्काएर विवाहसमेत गराइसकेकी छन्। बूढेसकालमा सुखसयलका साथ जीवन बिताउने बेला भए पनि सानो उमेरमा पढाइ पूरा गर्न नपाएको धोको भुसालले हजुरआमा बनेपछि पूरा गर्न लागेकी हुन्।
भुसालले अहिले स्थानीय वहाकी उच्च मावि परीक्षा केन्द्रबाट एसईई दिइरहेकी छन्। विसं २०४६ मा उनको विवाह भयो। कक्षा ९ को वार्षिक परीक्षा दिने बेला हुँदै थियो। त्यही बेला उनी सुत्केरी भइन्। छोरो जन्मियो। सुत्केरी भएपछि परीक्षा दिन त पाउनुभएन नै, त्यसपछि उनको पढाइ पनि रोकियो।
पढाइ छाडेको ३२ वर्षपछि अघिल्लो वर्ष उनी गाउँकै लक्ष्मीभवन माविमा कक्षा ९ मा भर्ना भइन्। कक्षा ९ उत्तीर्ण गरेर कक्षा १० को पढाइ पूरा गरेपछि अहिले भुसाल एसईईमा सहभागी भएकी हुन्।
पढ्नैपर्छ भन्ने कुनै बाध्यता नभए पनि थप शिक्षित बन्न ३२ वर्षपछि पुनः विद्यालय पढ्न थालेको परीक्षार्थी भुसालले बताइन्। उनले कक्षा ८ सम्म बिहादी गाउँपालिका–५ उरामको चन्द्र माविमा पढिन्। पाको उमेरमा भर्खरका केटाकेटीसँग बसेर अध्ययन गर्दा पनि आफूलाई असहज महसुस नभएको उनको भनाइ छ।
भुसालका छोरा र छोरीबाट तीन नातीनातिनासमेत भइसकेका छन्।
‘छोराबुहारीको कमाइबाट सुखसयलमा बसेको भए पनि हुन्थ्यो, तर सानैमा धेरै पढ्न नपाएकोमा पछुतो लागिरहेकाले पुनः पढ्न थालेकी छु’, उनले भनिन्, ‘एसईईपछि पनि कक्षा ११ र १२ अध्ययन गर्ने योजना छ।’
भुसाल बिहादी गाउँपालिकाकी पूर्वजनप्रतिनिधि पनि हुन्। उनी पहिलो स्थानीय तहको निर्वाचनमा नेपाली कांग्रेसबाट उम्मेदवार बनेर गाउँ कार्यपालिका सदस्य बनेकी थिइन्।
भुसाल अहिले पनि सक्रिय राजनीतिमै छिन्। उनी नेपाली कांग्रेस बिहादी गाउँ कार्यसमितिको सदस्य तथा नेपाल महिला सङ्घ बिहादीको कोषाध्यक्ष हुन्।
भुसालले १७ वर्ष महिला स्वास्थ्य स्वयंसेविकाका रूपमा पनि काम गरिसकेकी छन्।
कार्यपालिका सदस्यमा विजयी भएपछि उनले स्वयंसेविका काम छाडेकी हुन्। उनले २०४८ सालबाटै नेपाल विद्यार्थी सङ्घको जिल्ला सदस्य भएर राजनीति थालेकी हुन्।
‘राजनीति होस् वा अन्य क्षेत्रमा पढाइको ज्ञानसँगै प्रमाणपत्रसमेत आवश्यक पर्ने भएकाले पनि मलाई विद्यालय जान रहर जागेको हो’, उनले भनिन्।
घरमा छोराछोरीको जिम्मेवारी पूरा गरेपछि पढ्न सहज भएको उनले बताइन्। भुसालका श्रीमान् तिलक भुसाल नेपाली कांग्रेका नेता हुन्। उनी नेपाली कांग्रेस पर्वतको सहसचिव तथा सङ्गठन विभाग प्रमुख छन्।
‘सानै उमेरमा विवाह भएपछि पढाइ रोकिएको थियो, अहिले पुनः विद्यालय गएर पढ्न थालेकी छन्’, श्रीमान् तिलकले भने, ‘उनको इच्छाअनुसार जहिलेसम्म पढ्छिन, त्यति बेलासम्म पढ्ने वातावरण मिलाउँछु।’
श्रीमतीको पठनपाठन प्रभावित नहोस् भनेर आफूले घरायसी काममा सहजीकरण गरिदिने गरेको तिलकले बताए।
शिक्षा विकास तथा समन्वय एकाइ पर्वतले पर्वतमा एसईई दिने दुई हजार २८ विद्यार्थीमध्ये खगिसरा भुसाल सबैभन्दा पाको उमेरको विद्यार्थी रहेको जनाएको छ।
कार्यालय प्रमुख उद्धिमराज पौडेलले ५० वर्ष नाघेकी भुसाल जिल्लामै सबैभन्दा बढी उमेरको विद्यार्थी भएको बताए।
पर्वतकै पैंयु गाउँपालिकास्थित जनसेवा संस्कृत माविबाट १२ वर्षका शक्ति अधिकारीले पनि एसईई दिइरहेका छन्। अधिकारी जिल्लाकै सबैभन्दा कान्छो उमेरका विद्यार्थी हुन्। रासस
Shares
प्रतिक्रिया