नेकपा एमालेका सांसद रघुजी पन्तले औपचारिक कार्यक्रममा राष्ट्रपतिसहितका भीआईपीलाई लैजाँदा सरल उपाय अपनाउन माग गरेका छन्।
आइतवार दिउँसो संसद बैठक सुरु हुनेबित्तिकै विशेष समय लिएर बोल्ने क्रममा उनले यस्तो माग गरेका हुन्।
'राष्ट्रपतिको सवारीलाई लिएर रामवरण यादवको पालामा पनि विवाद भएको थियो। हामीले उतिबेलैदेखि यसलाई सरल र सहज बनाउनु भनेका हौ', उनले भने, 'शुक्रबार राष्ट्रपति निस्किँदा एम्बुलेन्स पनि जाममा पर्यो। सर्वसाधारणले दु:ख पाए।'
उनले राष्ट्रपतिको सवारी सरल बनाउने काममा सरकारले भूमिका नखेलेको बताए। 'सरकारले गल्ती गर्दा राष्ट्रपतिले गाली खाने? यसलाई सरलीकृत गरौँ भन्दा सरकार किन तयार हुँदैन?', उनले सोधे, 'आजका पत्रिकाका सम्पादकीयमा पनि राष्ट्रपतिको आलोचना भएको छ। यो विषयलाई गम्भीरतापूर्वक लिऔँ।'
उनले राष्ट्रपतिको आक्रोश सांसदहरुमाथि पनि पोखिएको बताए।
'राष्ट्रपतिको सवारीका कारण दु:ख पाएकाहरुले सांसदलई पनि गाली गरे। मैले लोगो नै छोपेर हिँड्नुपर्यो', उनले भने, 'यसलाई समयानुकुल परिमार्जन गर्नुपर्छ। सरकारले सरल उपाय नखोज्ने अनि राष्ट्रपतिले गाली खाने? भीआईपीका सवारीहरु औपचारिक कार्यक्रममा जाँदा सहज र सजिलो बनाइयोस्, यो काम सरकारको दायित्व हो।'
Shares
प्रतिक्रिया