युनिकोड
नेपाली कांग्रेसका महामन्त्री विश्वप्रकाश शर्माले अग्ला अग्ला टावर र ठूला ठूला एयरपोर्टहरूले देश समुन्नत नबन्ने बताएका छन्। सोमबार काठमाडौंमा भएको ट्रेड युनियन कांग्रेसको ७औं महाधिवेशनलाई सम्बोधन गर्दै उनले सो कुरा बताएका हुन्।
उनले देश समुन्नत छ की छैन भनेर मापन गर्नेकुरा भनेको देशमा बाँचिरहेको श्रमीकले सास फर्ने अवस्था छ की भन्ने कुरालाई हेर्न आवश्यक रहेको पनि बताए।
उनले श्रमीकले जीवन यापन सहज रुपमा गर्न नसकेसम्म देश समुन्नत हुन नसक्ने बताए।
‘कुनैपनि देश समुन्नत छ की छैन भन्नेकुराको पनि निश्चित मापदण्ड छ। त्यो भनेको सामान्यतया समुन्नत छ भन्दै गर्दा अग्ला अग्ला टावरहरु छन्,’ उनले भने, ‘ठूला ठूला एयरपोर्टहरू छन्, भव्यभव्य महलहरू छन्, हाइवेहरू छन् एक हिसाबले त्यो देशको समुन्नति भन्दा चित्र यो आउला। यो जरुरत त छ तर वास्तविक समुन्नतिको मापदण्ड त्यो होइन।’
कांग्रेस संस्थापक नेता बिपी कोईरालाले श्रमीकको हक हीतका लागि १५ वर्षे खाका बनाएपनि काम गर्ने समय नपाएको र अहिलेका नेताहरूले समय पाएपनि काम गर्ने योजना बनाउन नसकेको बताए।
उनले यो देशलाई बनाउन सक्ने योजना र कार्यक्रम कांग्रेसले बनाइरहेको बताए।
‘जननेता बिपी कोईरालाले आफू प्रधानमन्त्री भएको बेला जनतालाई केन्द्रमा राख्नुभयो र १५ वर्षको समुन्नतिको खाका बनाउनु भयो। बिपी कोईरालासँग सपना थियो, समय थिएन,’ शर्माले भने, ‘हामीसँग समय छ त्यस किसिमको सपना छैन। हामीसँग व्यवस्थित सपना भएन। यो देशमा धरै कुरा भएको छ, गर्न धेरै बाँकी छ, यो देश बनाउन सकिन्छ र सतीको सराप भएको होइन, भगवान गौतमबुद्धको आशिर्वाद प्राप्त देश हो।’
महामन्त्री शर्माले देशमा केही पनि भएको छैन भनेर निराश हुन नपर्ने बताए।
प्रतिक्रिया