राष्ट्रिय स्वतन्त्र पार्टीले संक्रमणकालीन न्यायसम्बन्धि विधेयक छिटो टुंग्याउनुपर्नेमा जोड दिएको छ।
पीडितमैत्री बनाएर सो विधेयकलाई छिटो टुंगोमा पुर्याउनुपर्ने आफ्नो पार्टीको धारणा रहेको रास्वपाका प्रमुख सचेतक सन्तोष परियारले बताए।
शुक्रवार सिंहदरबारमा पार्टीको संसदीय दलको बैठकपछि सञ्चारकर्मीसँग संक्षिप्त प्रतिक्रिया दिँदै उनले पीडितले न्याय पाउनेगरी सो सम्बन्धी विधेयकलाई छिटो टुंग्याउनुपर्ने बताए।
उनले भने, ‘लामो समयसम्म न्याय नदिइकन रहन सकिँदैन। हिजो जो युद्धरत थिए। हिजो जो राज्यपक्ष र विद्रोही थिए, आज ती सत्तामा छन्। अथवा ती आ–आफ्नो ठाउँमा छन्। न्याय कसले पाएनन् भन्दा जो प्रत्यक्ष, परोक्ष रुपमा द्वन्द्वमा परेकाहरुले न्याय पाएनन्।’
प्रमुख सचेतक परियारले सो विधेयक अघि बढाउने कुरामा अब ढिलाई गर्न नहुने बताए।
उनले थपे, ‘त्यसको लागि राष्ट्रिय स्वतन्त्र पार्टी राष्ट्रिय सहमती होस् भन्ने चाहन्छ। तर राष्ट्रिय सहमति भएन भनेर यसलाई धेरै समय राख्न सकिँदैन। र यसलाई पीडितमैत्री बनाएर न्याय सम्पादन हुनेगरी सत्यनै निरुपण हुने गरी गर्नुपर्छ भन्ने पक्षमा छौं।’
राष्ट्रिय स्वतन्त्र पार्टीले द्वन्द्वमा परेकाहरुलाई न्याय दिने कुरामा सबै राजनीतिक दलहरु सहमति नजिक रहेकाले पनि सो विधेयक टुंगोमा पुर्याउनु कुरामा ढिलाई गर्न नहुने अडान राख्दै आएको छ।
Shares
प्रतिक्रिया