बुधबारदेखि इलाम २ र बझाङमा निर्वाचन आचारसंहिता लागू हुँदै

आगामी वैशाख १५ गते हुने उपनिर्वाचनका लागि बुधबारदेखि सम्बन्धित निर्वाचन क्षेत्रमा आचारसंहिता लागू हुने भएको छ।

उपनिर्वाचनलाई स्वच्छ, स्वतन्त्र, निष्पक्ष, भयरहित र सुरक्षित वातावरणमा गर्न बुधबारदेखि इलाम क्षेत्र नम्बर २ र बझाङ प्रदेश सभा १ मा  आचारसंहिता लागू गर्ने निर्णय भएको हो।

निर्वाचन आयोगमा रहेको उच्चस्तरीय निर्वाचन सुरक्षा समितिको बैठकको सिफारिका आधारमा इलाम क्षेत्र नं २ र बझाङको प्रदेशसभा निर्वाचन क्षेत्र नं १ मा आचारसंहिता लागू गराउन जिल्ला निर्वाचन आचारसंहिता अनुगमन समितिलाई निर्देशन दिने निर्णय भएको हो। 

यसैगरी राजनीतिक दल, उम्मेदवार, दलको भ्रातृ संगठन तथा सम्बन्धित व्यक्तिले पालना गर्नुपर्ने आचारणअन्तर्गत जुलुस, आमसभा, कोणसभा, बैठक र भेलासम्बन्धी विषय, सवारीसाधनको प्रयोग, सञ्चारमाध्यमको प्रयोगसम्बन्धी विषय र निर्वाचन खर्चसम्बन्धी विषयमा दैनिक विवरण लिन पनि आयोगले भनेको छ।

आयोगस्थित उच्चस्तरीय निर्वाचन सुरक्षा समितिको बैठकले निर्वाचन सुरक्षा व्यवस्थाको तयारीबारे पनि समीक्षा गरेको पौडेलले बताए।