सत्तारुढ प्रमुख घटक नेकपा (एमाले) का अध्यक्ष एवं पूर्वप्रधानमन्त्री केपी शर्मा ओलीले संवैधानिक दायरामा आएर राजनीतिक गतिविधिलाई अघि बढाउन राष्ट्रिय प्रजातन्त्र पार्टी (राप्रपा) लाई चेतावनी दिएका छन्।
गणतन्त्रमा नागरिकका अधिकार सुरक्षित रहने भएकाले संवैधानिक बाटोबाटै समस्या समस्याको समाधान गर्न सकिने भएकाले सोही अनुसारको गतिविधि अघि बढाउन उनले राप्रपालाई सचेत पनि गराए।
‘अराजकता बढयो समाजमा। के बोल्ने, के नबोल्ने, के गर्ने, के नगर्ने? जस्ता कुराहरु भएनन्। र अहिले पनि केही मान्छेहरुमा उत्ताउलापनहरु देखिन्छन्। म ती राजनीतिक शक्ति र व्यक्तिहरु छन्। त्यस्ता राजनीतिक समूह वा व्यक्तिहरुलाई आग्रह पनि गर्न चाहन्छु, सुझाव पनि दिन चाहन्छु–संविधानको दायरा भित्र आउनुस्। संवैधानिक र शान्तिपूर्ण दायरा भित्र आउनुस् र त्यस भित्रका माग र चिन्तन जे छन्, संविधान भित्रबाट गर्नुस्,’ ओलीले भने।
शनिबार काठमाडौंमा आयोजित एक कार्यक्रममा बोल्दै अध्यक्ष ओलीले संविधान नै नमान्ने, परिवर्तन नै नमान्ने, जनताको सर्वोच्चता नै नमान्ने र एउटा मालिक चाहियो भनेर कुद्ने गतिविधि सह्य नहुने बताए।
‘अहिले संवैधानिक बाटोबाट कुनै पनि माग पूरा गर्न कतै प्रतिबन्ध छैन। निरंकुशताका समयमा राजतन्त्र भएका बेलामा त्यसले प्रतिगमन गथ्र्यो। अहिले जनताका अधिकार खोसिँदैन। खोस्न मिल्दैन। यो राजतन्त्र भएको समय होइन, खोस्न मिल्दैन। यो गणतन्त्र हो। त्यसैले यहाँ जनताका नागरिकका अधिकारहरु सुरक्षित रहन्छन,’ उनले भने।
गणतन्त्रमा नागरिक सर्वोच्चता हुने भएकाले कुनै मालिकलाई स्थापना गरेर राज्य अघि बढ्न नसक्ने बताउँदै उनले कुनैपनि माग सम्बोधन गर्न नेपालको संविधानले प्रतिवन्ध नलगाएकोतर्फ पनि राप्रपालाई सचेत गराए।
‘अधिकारहरुको प्रयोग संविधान भित्रबाट गरेर अगाडि बढ्न पाईन्छ, गर्न सकिन्छ। संविधान नै नमान्ने, परिवर्तन नै नमान्ने, जनताको सर्वोच्चता नै नमान्ने र मलाई एउटा मालिक चाहियो भनेर कुद्ने। त्यसले एउटा व्यक्तिलाई मालिक थपना गर्दैन। देशले नागरिक सर्वोच्चतालाई मान्छ। जनतामा रहेको सार्वभौमसत्तालाई मान्छ। सबै कुरा माग्न पाइन्छ। त्यो पनि संविधान भित्रबाट गर्नु पर्छ। संविधानले शान्तिपूर्ण ढंगबाट परिवर्तनको मागलाई इन्कार गरेको छैन। हकहरु दिएको छ। पञ्चायत कालमा दिएको थिएन। बोल्यो भने अनेक मुद्दा लगाईदिन्थ्यो’, ओलीले भने।
Shares
प्रतिक्रिया