कमल थापा नेतृत्वको राष्ट्रिय प्रजातन्त्र पार्टी (राप्रपा) र पशुपति शमसेर राणा र डा. प्रकाशचन्द्र लोहनीको नेतृत्वमा रहेको राप्रपा संयुक्तबीच शनिबार बेलुका पार्टी एकीकरण गर्ने सहमति भएको छ।
थापा, राणा र लोहनीद्वारा हस्ताक्षरित एकीकरणसम्बन्धी आधारपत्रमा तीनै जना अध्यक्ष रहने गरी पार्टी एकीकरण गरिएको छ भने सो पार्टीको चुनाव चिन्ह ६ महिनाभित्र टुंगो लगाउने सहमति भएको छ।
शनिबार गरिएको १० बुँदे सहमतिका आधारमा पार्टी एकताको औपचारिक घोषणा फागुन २८ गते गर्ने बताइएको छ।
‘सबै धर्मका बीच समानता र पूर्ण धार्मिक स्वतन्त्रता सहितको सनातन धर्मसापेक्ष हिन्दुराष्ट्र हुने र सबै पक्षहरुलाई चित्त बुझ्ने सहमति र साझा संस्थाको रुपमा राजसंस्था सहितको प्रजातन्त्र’ एकीकरणपछि राप्रपाको मुख्य नीति र सिद्धान्त हुने सहमतिमा बताइएको छ।
डेढ वर्षभित्र एकिकृत पार्टीको महाधिवेशन गर्ने र त्यतिबेलासम्म थापा, राणा र लोहनी तीन जना एकीकृत पार्टीको अध्यक्ष हुने सहमति गरिएको छ।
महाधिवेशनसम्म पार्टीको दैनिक कार्यसंचालनको लागि तीन अध्यक्ष समेत सदस्य रहने गरी निर्देशन समिति रहने सहमति भएको छ।
तीनैजना अध्यक्षको हैसियत र मर्यादाक्रम समान हुने र निर्देशन समिति, केन्द्रीय कार्यसम्पादन समिति र केन्द्रीय कार्यसमितिको बैठकको अध्यक्षता आलोपालो गर्ने सहमति गरिएको छ।
‘सम्पूर्ण राष्ट्रवादीहरुलाई खुसीको खबर। देशमा एउटा बलियो राष्ट्रवादी प्रजातान्त्रिक शक्ति बनाउने उद्देश्यका साथ तथा, सदैव एकताबद्ध रहने प्रणसहित राप्रपा र राप्रपा (संयुक्त) बीच एकीकरण गर्ने निर्णय गरेका छौं। एकीकरणको औपचारिक घोषणा सभा फागुन २८ गते हुनेछ,’ सहमति भएको केहि मिनेटमैं राप्रपा अध्यक्ष थापाले ट्विटरमा लेखेका छन्
प्रतिक्रिया