हङकङबाट तस्करी गरी काठमाडौं ल्याइएको ६० किलो सुन प्रकरणको अनुसन्धान प्रतिवेदन नेपाल प्रहरीको केन्द्रीय अनुसन्धान ब्युरो (सीआईबी) ले आज (बुधबार) जिल्ला सरकारी वकिल कार्यालयमा बुझाउँदै छ।
सीआईबीले त्यसअघि कार्यालयमै पत्रकार सम्मेलन गर्दैछ। उक्त पत्रकार सम्मेलन सीआईबी प्रमुख एआईजी किरण बज्राचार्यको उपस्थितिमा हुँदैछ।
अनुसन्धान प्रतिवेदन बुझाउनुअघि लाजिम्पाटस्थित सीआईबी कार्यालयमा बिहान साढे ११ बजे पत्रकार सम्मेलन गरी उक्त प्रकरणबारे विस्तृत जानकारी गराइएको हो।
उक्त सुन तस्करी प्रकरणमा अहिलेसम्म ३१ जना पक्राउ परेका छन्। तीमध्ये ३० जना प्रहरीको नियन्त्रणमा छन् भने स्वास्थ्यका कारण एक आरोपितलाई बाहिर राखेर सीआईबीले अनुसन्धान गरिरहेको छ।
आरोपितहरूविरुद्ध सङ्गठित अपराध, सुन चोरी पैठारीलगायत कसुरमा मुद्दा चलाउन राय दिने तयारी सीआईबीले गरेको छ। उक्त प्रकरणमा भन्सार कार्यालयका कर्मचारीसहित नेपाल, भारत र चिनियाँ नागरिकसमेत छन्। उक्त प्रकरणमा भन्सार एजेन्ट र सुन व्यापारीसमेत जोडिएका छन्।
प्रतिक्रिया