युनिकोड
मंगलबार दिउँसोदेखि काठमाडौं उपत्यकामा वर्षा हुने क्रम जारी छ। बुधबार बिहान १० बजेसम्म पनि उपत्यकाका विभिन्न स्थानमा पानी परिरहेको छ।
मौसम पूर्वानुमान महाशाखाकी मौसमविद् शान्ति कँडेलका अनुसार काठमाडौँ उपत्यकामा हिजो (मंगलबार) दिउँसो २ बजेदेखि पानी पर्न थालेको हो।
‘बीचबीचमा केही बेर रोकिने र फेरि पानी पर्ने क्रम अहिलेसम्म जारी छ’, उनले भनिन्, ‘यो क्रम आज दिनभर जारी रहने देखिन्छ।’
उनका अनुसार पछिल्लो समय आज बिहान सवा ५ बजेदेखि उपत्यकामा लगातार वर्षा भइरहेको छ।
‘बीचबीचमा केही बेर रोकिए पनि आज दिनभर मौसम यस्तै रहने देखिएको छ’, मौसमविद् कँडेलले भनिन्, ‘आज रातभर पनि पानी पर्ने क्रम जारी रहने अनुमान छ, तर गएराति जत्तिको वर्षाचाहिँ हुने देखिन्न।’
उनका अनुसार भोलि बिहीबारबाट मात्र काठमाडौँ उपत्यकाको मौसम सुधार हुने सम्भावना छ।
प्रतिक्रिया