छात्रवृत्ति खाने प्रधानाध्यापकलाई ६ महिना कैद

बैजनाथ गाउँपालिका-८, थपवा, बाँकेको शंकर माध्यमिक विद्यालयका प्रधानाध्यापक मुहम्मद युनुस खाँ भ्रष्टाचार मुद्दामा दोषी ठहर भएका छन्।

जिल्ला शिक्षा कार्यालय, बाँकेबाट २०६८ देखि २०७४ सम्ममा छात्रवृत्ति र कम्प्युटर खरिदको लागि प्राप्त रकम हिनामिना गरेको विशेष अदालतको ठहर छ। विशेष अदालतका अध्यक्ष टेकनारायण कुँवर, तेजनारायणसिंह राई र मुरारीबाबु श्रेष्ठको इजलासले खाँई दोषी ठहर गरेको हो।

खाँले सार्वजनिक सम्पत्तिको हानिनोक्सानी गरेको बिगो ३ लाख २ हजार रुपैयाँ असुल गरी त्यति नै जरिवाना तथा ६ महिना कैद हुने फैसला भएको विशेष अदालतका प्रवक्ता धनहादुर कार्कीले जानकारी दिए।