युनिकोड
सहकारीबाट ऋण निकाल्न लगाएर बाराका ३६ जना महिलालाई ठग्ने २ जना पक्राउ परेका छन्। पक्राउ पर्नेमा बाराको सुवर्ण गाउँपालिका ८ का ५३ वर्षीय झुल खाँ पैठान र प्रसौनी गाउँपालिका ७ का ५० वर्षीय जहिर मियाँ रहेका छन्।
उनीहरुले महिलाहरुलाई सहकारीबाट ऋण निकाल्न लगाएर लगेका थिए। महिलाहरुलाई ऋणको किस्ता तिरिदिने र ब्याज पनि दिने भन्दै लोभमा पारेका थिए।
२२ जनाले सहकारी तथा लघुवित्तबाट निकालेको ८३ लाख ८१ हजार रुपैयाँ पैठानलाई दिएका थिए। पैठानले सहकारीको किस्ता र उक्त रकमको ब्याज महिलाहरुलाई नै दिने भने पनि रकम लिएर फरार भएका थिए।
जहिर मियाँले १४ जना महिलाबाट ४० लाख ९५ हजार ८ सय ९३ रुपैयाँ लिए पनि केही समयपछि किस्ता नतिरी फरार भएका थिए।
उनीहरुलाई पक्राउ गरी ठगी मुद्दामा अनुसन्धान भइरहेको प्रहरीले जनाएको छ। पैठानलाई १० दिन र मियाँलाई ७ दिन म्याद थप गरी अनुसन्धान गरिरहेको बारा प्रहरीको भनाई छ।
प्रतिक्रिया