सरकारले विदेशबाट नेपालीहरुलाई स्वदेश ल्याउने काम आजबाट प्रारम्भ गरेको छ। म्यान्मारले आफ्ना नागरिक लिन आउँदा २६ जना नेपालीलाई पनि लिएर आएको हो।
बिहान ९ः५० मा त्रिभुवन विमानस्थलमा अवतरण गर्ने भनेको जहाज १०ः४३ मा अवतरण गरेको थियो। सोही जहाजले नेपालबाट फर्कदा ४३ जना म्यान्मारका नागरिक लिएर फर्किने त्रिभुवन विमानस्थलका प्रवक्ता देवचन्द्र लाल कर्णले नेपालखबरलाई बताए।
आजै यूएईबाट पनि नेपाली फर्कदै छन्। यूएई सरकारले नै आफ्नो जहाजमा रोजगारमा गएकालाई फर्काउन लगेको हो। प्राधिकरणका अनुसार १६८ नेपाली यूएईबाट आउँदै छन्।
संसारभर कोरोना संक्रमणको संकट गहिरिँदै गएपछि सरकारले स्वदेश फर्कन चाहने नेपाली नागरिकलाई क्रमशः ल्याउने निर्णय गरेअनुसार पहिलोपटक म्यान्मारबाट नेपाली ल्याइएको हो।
यसअघि चीनको वुहानबाट विमान चार्टर गरी नेपाली विद्यार्थी सहित १७५ जना नेपाली नागरिकलाई गत फागुनमा ल्याइएको थियो।
प्रतिक्रिया