कोरोना संक्रमणबाट भक्तपुरमा अहिलेसम्म १० जनाको मृत्यु

मिर्गौला रोगबाट पीडित भक्तपुरकी एक महिलाको कोरोना भाइरसको संक्रमणबाट मृत्यु भएको छ।

मध्यपुरथिमि नगरपालिका–६ दुवाफल्चाकी ४० वर्षीया महिलाको पाटन अस्पतालमा उपचारकै क्रममा बिहीबार मृत्यु भएको जिल्ला स्वास्थ्य कार्यालय भक्तपुरका प्रमुख कृष्ण मिजारले जानकारी दिए।

ती महिलालाई कोरोना भाइरस संक्रमण पुष्टि भएपछि यही भदौ ३ गते अस्पताल भर्ना गरिएकामा उपचारकै क्रममा गए राति मृत्यु भएको नगरपालिकाका प्रमुख मदनसुन्दर श्रेष्ठले जानकारी दिए। मृतक महिलाका श्रीमानसहित परिवारका अन्य दुई जनामा पनि संक्रमण पुष्टि भएपछि होम आइसोलेसनमा राखिएको बताइएको छ।

यससँगै भक्तपुरमा कोरोना संक्रमणबाट मृत्यु हुनेको संख्या १० पुगेको छ। तीमध्ये पाँच मध्यपुरथिमि, चार सूर्यविनायक र एक जना भक्तपुर नगरपालिकाका हुन्। रासस