सशस्त्र प्रहरीको एपीएफ क्लब र लुम्बिनी प्रदेश दाङमा जारी प्रधानमन्त्री कप राष्ट्रिय महिला क्रिकेट प्रतियोगिताको सेमिफाइनलमा प्रवेश गरेका छन।
दाङको लमहीमा भएको खेलमा आइतबार एपीएफले प्रदेश २ लाई ८ विकेटले पराजित गर्दै सेमिफाइनलमा स्थान बनाएको हो। यो एपीएफको लगातार दोस्रो जित हो।
आइतबार बिहान कर्णाली प्रदेशलाई पराजित गरेको लुम्बिनी प्रदेशले पनि समूह ए बाट सेमिफाइनलमा स्थान बनाएको छ।
समुह ए का अन्य दुई टोली प्रदेश २ र कर्णाली प्रदेशले लगातार दुबै खेलमा पराजित हुँदै प्रतियोगिताबाट बाहिरिएका छन।
आइतबार दिउँसो प्रदेश २ ले दिएको ७३ रनको लक्ष्य एपीएफले १३ दशमलव १ ओभरमा २ विकेटको क्षतिमा भेट्टायो।
एपीएफको जितमा ज्योति पाण्डेले ३० र कप्तान सीता रानामगरले १८ रनको योगदान दिए। सरिता मगर ६ र इन्दु वर्मा १ रनमा नटआउट रहे।
प्रदेश २ की सरस्वती कुमारी र कविता गौतमले समान १ विकेट झारे।
त्यसअघि टस जितेर पहिले ब्याटिङ गरेको प्रदेश २ ले निर्धारित ओभरमा ८ विकेट गुमाँउदै ७२ रनको योगफत तयार पारेको थियो।
प्रदेश २ का लागि अनुराधा चौधरीले सर्वाधिक १८ रन जोडेको इनिङ्समा शोभा आलेले १३ रन जोडिन्। ३ खेलाडीले भने खातै खोल्न नसक्दा अन्य खेलाडीले दोहोरो अंकको स्कोर छुन सकेनन्।
एपीएफका लागि सीता रानामगरले २ तथा रेखा रावल, करुणा भण्डारी, इश्वरी विष्ट र राजमती ऐरीले समान १ विकेट लिए।
समुह ए को अन्तिम खेलमा भोलि प्रदेश २ र कर्णली प्रदेश तथा एपीएफ र लुम्बिीनी प्रदेश भिड्नेछन्।
सेमिफाइनलमा स्थान बनाइसकेका एपीएफ र लुम्बिनीले सोमबार समुह विजेताको लागि प्रतिस्पर्धा गर्नेछन्।
Shares
प्रतिक्रिया