युनिकोड
प्रधानमन्त्री पुष्पकमल दाहाल प्रचण्डले चीनको प्रत्यक्ष लगानीमा नेपालमा बनेका जलविद्युत् आयोजनाको बिजुली किन्ने कुरामा भारतको असहमति रहेको बताएका छन्।
सिंहदरबारमा बसेको कानुन, न्याय तथा मानव अधिकार समितिको बैठकमा उनले यस्तो बताएका हुन्।
साताअघि भारतीय विदेशमन्त्री एस जयशंकर नेपाल आएका बेलामा भएको नेपाल—भारत १० वर्षमा १० हजार मेगावाट विद्युत सम्झौताका समयमा पनि यो कुरा उठेको दाहालले बताए।
भारतले चीन सरकारले नेपालमा प्रत्यक्ष लगानी गरेका जलविद्युत् आयोजनाबाट उत्पादित बिजुली किन्ने कुरामा जयशंकरको भ्रमणका बेला पनि रिजर्भेसन राखेको उनले बताए।
तर प्रधानमन्त्री दाहालले चीन सरकारको प्रत्यक्ष लगानी रहेका आयोजनाका बिजुली नकिन्ने कुरामा भारत सरकारको चासो रहेको बताए। ‘चीन सरकारको प्रत्यक्ष लगानीको बिजुली लिने कुरामा भारत सरकारको रिजर्भेसन छ’, उनले भने, ‘चीनले प्रत्यक्ष लगानी गरेका आयोजनाको बिजुली किन्न भारत असहमत भएकाले यसबारे हामी वार्ता गर्दैछौँ।’
दाहालले चिनियाँ ठेकेदारले उत्पादन गरेको बिजुलीलाई चिनियाँ भन्निदिनु भएन भनेर आफूहरूले आग्रह गरिरहेको पनि बताए। ‘ग्लोबल टेन्डरबाट निर्माण हुने आयोजनालाई चिनियाँ भन्नु राम्रो होइन। टेन्डरबाट चिनियाँ ठेकेदार कम्पनीले आयोजना लिएर बनाउने हुन्’, उनले भने, ‘त्यहाँ चीनको प्रत्यक्ष लगानी छ भन्नु हुँदैन। यसबारेमा हामी भारत सरकारलाई मनाउने कोसिसमा छौँ।’
प्रतिक्रिया