उखुको मूल्य वृद्धिसहितका विभिन्न माग राखेर चरणवद्ध सडक संघर्ष गर्दै आएका सर्लाहीका किसानले मंगलबार साँझ हरिवनमा राँके जुलुस निकालेका छन्।
इन्दु शंकर चिनी उद्योग नजिकै हरिवनस्थित पूर्वपश्चिम राजमार्गमा किसानले राँके जुलुस निकालेका हुन्। जुलुसमा सयौँ किसान सहभागी थिए।
चिनीको बिक्री मूल्य र उखुको उत्पादन लागतको आधारमा यस वर्ष उखुको मूल्य प्रतिक्विन्टल ७५० रुपैयाँ कायम गरिनुपर्ने माग किसानहरुको छ। उनीहरुले उखुको न्यायोचित मूल्य कायम नभएसम्म आन्दोलन जारी राख्ने बताएका छन्।
गत वर्ष बेचेको उखुको सरकारले दिन बाँकी अनुदान बापतको रकम तुरुन्त भुक्तानी दिनुपर्नेसहितका माग राखेर सर्लाहीका किसान दुई सातादेखि आन्दोलनमा छन्।
गएको शुक्रबार हरिवनमा उखुका लाँक्रासहित वृहत प्रदर्शन गरेका उखु किसानले सोमबार सडकमै सुतेर विरोध जनाएका थिए। गएको आइतबार उनीहरुले प्रतिकात्मक रुपमा कृषिमन्त्री र अर्थमन्त्रीको कुर्सी जलाएर विरोध गरेका थिए।
पूर्व निर्धारित कार्यक्रम अनुसार बुधबार पूर्व पश्चिम राजमार्गमा चक्काजाम गरेर सरकार र उद्योगीलाई खबरदारी गरिने मिलगेट उखु उत्पादक समिति सर्लाहीका अध्यक्ष राजकुमार उप्रेतीले जानकारी दिए।
नेपाल उखु उत्पादक महासंघ, मिलगेट उखु उत्पादक समिति, किसान हकहित संरक्षण समिति लगायतका संगठनले सर्लाहीमा उखुको मूल्यवृद्धिको माग गर्दै संयुक्त रुपमा आन्दोलन र विरोधका कार्यक्रम गर्दै आएका छन्।
किसान आन्दोलनको कारण हरिवनस्थित इन्दु शंकर चिनी उद्योग सञ्चालनमा आउन सकेको छैन।
गत वर्ष सरकारले उखुको मूल्य प्रतिक्विन्टल ६ सय १० रुपैयाँ कायम गरेको थियो। जसमा सरकारले किसानलाई अनुदान बापत दिने भनिएको प्रतिक्विन्टल ७० रुपैयाँसमेत जोडिएको छ।
तर, सरकारले दिने भनेको अनुदानको ७० रुपैयाँ देशका अधिकांश किसानले अझै पाएका छैनन्। सर्लाहीका किसानको झण्डै २९ करोड रुपैयाँ अनुदानको रकम बाँकी छ। जुन रकम अर्थ मन्त्रालयले अझै पठाएको छैन।
गएको मंसिर १७ गते कृषि मन्त्रालयमा उखुको मूल्य निर्धारणको लागि उद्योगी र किसानबीच वार्ता भएको थियो।
उक्त वार्तामा सरकारको तर्फबाट यस वर्षको लागि उखुको मूल्य गत वर्षभन्दा प्रतिक्विन्टल ११ रुपैयाँ बढाउन प्रस्ताव भएको थियो। तर, किसान प्रतिनिधिले सरकारले प्रस्ताव गरेको मूल्य अस्वीकार गरेर आन्दोलन अघि बढाएका हुन्।
Shares
प्रतिक्रिया